Barði NK á landleið

Barði NK í Hafnarfirði.  Ljósm. Þorgeir BaldurssonFrystitogarinn Barði NK hefur að undanförnu verið á úthafskarfaveiðum á Reykjaneshrygg og aflað vel.  Skipið hefur nú hætt veiðum og er á landleið. Veiðin hefur farið heldur minnkandi, skollin á bræla og er bræluspá fyrir næsta sólarhring. Von er á skipinu til Neskaupstaðar á þriðjudagskvöld.

Þessi veiðiferð Barða mun taka alls 20 daga og þar af hafa 6 dagar farið í siglingu. Heildaraflinn í öllum túrnum er 560 tonn upp úr sjó en skipið millilandaði í Hafnarfirði 18. maí sl.

Barði heldur ekki til úthafskarfaveiða á ný. Næst verður haldið í grálúðu- og ufsatúr hinn 3. júní nk.


Barði NK gerir það gott á úthafskarfanum

Barði NK millilandar í Hafnarfirði 18. maí s.l.  Ljósm. Þorgeir BaldurssonFrystitogarinn Barði NK hélt til úthafskarfaveiða á Reykjaneshrygg hinn 8. maí sl. og hefur skipið aflað mjög vel. Barði hélt til Hafnarfjarðar og millilandaði þar tæplega 7900 kössum eða 166 tonnum af frystum afurðum laugardaginn 18. maí. Að löndun lokinni hélt hann strax aftur á miðin og er væntanlegur til Neskaupstaðar fyrir sjómannadag eða þegar lokið verður við að veiða kvóta skipsins.

Bjarni  Ólafur Hjálmarsson skipstjóri lætur afar vel af úthafskarfaveiðinni. Hann segir að þeir á Barða séu yfirleitt að fá um 30 tonn eftir 13 tíma hol og það þýði að frystitækin um borð séu fullnýtt og allt gangi eins og í sögu. Eftir hvert hol þarf skipið að bíða í alllangan tíma til að geta togað á ný en mikill fjöldi skipa er á miðunum og raða þau sér upp og toga hvert á eftir öðru á veiðisvæðinu.


Síldarvinnslan tók á móti tæplega 36 þúsund tonnum af kolmunna á nýliðinni vertíð

Fiskimjölsverksmiðjan í Neskaupstað.Kolmunnavertíðinni er lokið hjá Síldarvinnslunni. Vertíðin var ágætlega heppnuð, almennt fiskaðist vel á miðunum suður af Færeyjum en brælur voru þó óþægilega tíðar. Liðlega eitt hundrað þúsund tonn  af heildarkvótanum kom í hlut íslenskra skipa á vertíðinni. 

Síldarvinnsluskipin Börkur og Beitir lögðu stund á kolmunnaveiðar og var afli þeirra sem hér segir:

 

Börkur NK 8.960 tonn

Beitir NK 10.289 tonn

 

Lesa meira...

Reyklaus áhöfn á Beiti NK

Beitir NK.  Ljósm. Þorgeir BaldurssonSá áfangi náðist eftir loðnuvertíðina sl. vetur að Beitir NK varð reyklaust skip. Það hefði einhvern tímann þótt saga til næsta bæjar að enginn í áhöfn íslensks fiskiskips af þessari stærð reykti um borð en það hefur löngum viljað loða við íslenska sjómenn að þeir væru býsna háðir tóbakinu og fyrir marga þeirra dugði ekkert annað en filterslaus Camel.

 

Að sögn Hjörvars Hjálmarssonar skipstjóra á reykleysið sér nokkurn aðdraganda. Sá næst síðasti í áhöfninni sem hætti að reykja lagði sígaretturnar á hilluna fyrir um það bil einu ári og sá síðasti lét undan nokkrum þrýstingi og kvaddi tóbakið í lok loðnuvertíðarinnar. Hjörvar sagði að þegar nótaveiðar hófust á síðustu loðnuvertíð og bætt var við mönnum í áhöfnina hefði hinum nýráðnu verið gerð grein fyrir því að þeir væru að ráða sig á skip sem áformað væri að yrði reyklaust, þeir væru í reynd að ráða sig á reyklausan vinnustað. Þeir sem hlutu ráðningu og reyktu tilkynntu strax að þeir væru hættir ósómanum og við það var staðið.

 

Lesa meira...

Kolmunnavertíð að ljúka

Börkur NK.  Ljósm. Þórhildur Eir SigurgeirsdóttirBörkur NK er á landleið með fullfermi af kolmunna og er þetta síðasta veiðiferð hans á yfirstandandi vertíð. Hann er væntanlegur til Neskaupstaðar í fyrramálið. Hákon EA er einnig á landleið og kemur til Neskaupstaðar í dag. Beitir NK kom úr sinni síðustu veiðiferð á vertíðinni um sl. helgi.

Sturla Þórðarson skipstjóri á Berki sagði að framan af þessari síðustu veiðiferð hefði veður verið óhagstætt en undir lokin batnaði það og þá brast á mokveiði.  Skipið var fyllt í 6 eða 7 holum en Börkur lestar 1800 tonn.  Veiðisvæðið var 40-50 mílur suð-suðvestur af Akrabergi en Akrabergið er syðsti oddi Færeyja.

Lesa meira...

Mjög góð úthafskarfaveiði hjá Barða NK

Barði NK.  Ljósm. Guðlaugur BirgissonFrystitogarinn Barði NK hélt til úthafskarfaveiða á Reykjaneshrygg hinn 8. maí sl. og hóf hann veiðar hinn 10. maí. Aflabrögð hafa verið mjög góð frá upphafi og hefur afkastageta frystitækjanna um borð verið fullnýtt.

Ráðgert er að skipið millilandi um 180 tonnum af frystum afurðum í Hafnarfirði nk. laugardag. Ætti löndun að vera lokið á laugardagskvöld og þá verður á ný haldið á úthafskarfamiðin. Síðan er áformað að veiðiferðinni ljúki í Neskaupstað fyrir sjómannadag.

Birtingur NK í slipp á Akureyri

Birtingur NK í slipp á Akureyri.  Ljósm. Þorgeir BaldurssonBirtingur NK hélt norður til Akureyrar í síðustu viku og var þar tekinn í slipp. Er hér um „hefðbundinn slipp" að ræða eins og sagt er, en auk þess verður skipið málað hátt og lágt. Birtingur ætti því að vera fínn og vel til hafður þegar honum verður lagt að aflokinni slippferðinni. Vonandi mun hann síðan koma í góðar þarfir á næstu loðnuvertíð eins og hann hefur gert á undanförnum tveimur vertíðum.

 

Síldarvinnslan fyrir 45 árum


Í þessum sögulega þætti verður stuttlega fjallað um starfsemi fyrirtækisins á árinu 1968. Hafa verður í huga að á árinu 1965 jókst mjög fjölbreytni þeirrar starfsemi sem Síldarvinnslan sinnti. Það ár hóf fyrirtækið útgerð með eigin skipum og festi einnig kaup á þeim framleiðslutækjum sem Samvinnufélag útgerðarmanna hafði byggt upp í Neskaupstað. Á meðal þeirra framleiðslutækja voru hraðfrystihús og síldarsöltunarstöð.
  • Síldarsöltun á söltunarstöð Síldarvinnslunnar undir lok síldarævintýrisins.  Ljósm. í eigu Skjala- og myndasafns NorðfjarðarÁ árinu 1968 var hið svonefnda síldarævintýri að fjara út. Afgerandi breyting varð á hegðun síldarinnar og minnkaði veiðin mikið. Í lok júlí hélt síldin sig langt norður í Dumbshafi, enn lengra frá landinu en árið áður. Um þetta leyti var svo komið að um 1.000 mílur voru frá miðunum til Íslandsstranda. Um sumarið og haustið héldu Norðfjarðarbátar til síldveiða í Norðursjó en þær veiðar höfðu hafist árið áður. Þegar hausta tók fannst síld nær landinu en vegna stöðugra ógæfta gengu veiðar illa. Þegar síldin kom síðan á vetursetustöðvarnar í öndverðum október þétti hún sig ekki og var því vart veiðanleg. Eftir þetta má segja að norsk-íslenski síldarstofninn, sem hafði verið helsta auðsuppspretta Austfirðinga um árabil, hyrfi úr sögunni um langt skeið.

    Lesa meira...

Misjöfn kolmunnaveiði

Beitir NK og Börkur NK : Ljósm.Þorgeir Baldursson

Kolmunnaveiðin á miðunum við Færeyjar hefur verið misjöfn síðustu daga. Hjörvar Hjálmarsson skipstjóri á Beiti NK segir að nú sé veiðin frekar róleg og eftir þetta megi búast við að hún fari að daprast verulega. Beitir er kominn með 1600 tonn í 5 holum. Börkur NK lagði af stað af miðunum með fullfermi í gærmorgun og er hann væntanlegur til löndunar á Seyðisfirði í kvöld.

Það er farið að síga á seinni hluta kolmunnavertíðarinnar og eru allmörg skip búin með kvótann eða við það að klára hann. Beitir er hugsanlega í sínum síðasta túr en Börkur á sennilega einn túr eftir að þessum loknum.

 

Ágæt kolmunnaveiði

Beitir NK.  Ljósm. Þorgeir BaldurssonÁgæt kolmunnaveiði er nú á miðunum við Færeyjar. Heimasíðan hafði samband við Hjörvar Hjálmarsson skipstjóra á Beiti NK en Beitir var þá á veiðum um 70 mílur suður úr Mykinesi. Hjörvar sagði eftirfarandi um veiðina: „Við hófum veiðar í gær en þá var tómt bras á okkur því höfuðlínukapallinn var í ólagi.

Lesa meira...

Síldarvinnslan ræður 70 ungmenni til sumarstarfa

Úr fiskiðjuveri Síldarvinnslunnar.  Ljósm. úr safni SVN

Nýverið gekk Síldarvinnslan frá ráðningu um 70 ungmenna til sumarstarfa í Neskaupstað. Um er að ræða ráðningu í tvo starfsmannahópa; annars vegar starfsmenn í fiskiðjuver og hins vegar hóp sem sinnir umhverfisverkefnum.

Til starfa í fiskiðjuverinu voru ráðnir rúmlega 50 starfsmenn og eru flestir þeirra á aldrinum 18-20 ára. Munu þessir starfsmenn stunda vaktavinnu á makríl- og síldarvertíðinni sem hefst í júnímánuði.

Lesa meira...

Síldarvinnslan fyrir 50 árum

Síldarverksmiðja Síldarvinnslunnar eins og hún leit úr árið 1963.  Ljósm. Hjörleifur GuttormssonStofnfundur Síldarvinnslunnar hf. Í Neskaupstað var haldinn hinn 11. desember árið 1957. Tilgangur félagsins var að reisa og reka síldarverksmiðju, síldarverkun og annan skyldan atvinnurekstur í Neskaupstað. Síldarverksmiðjan var reist á árinu 1958 og hinn 17. júlí það ár hófst móttaka síldar til mjöl- og lýsisvinnslu. Þar með var starfsemi Síldarvinnslunnar á sviði fiskvinnslu hafin.

Lesa meira...

Vinnsla á kolmunna í fullum gangi í Neskaupstað og á Seyðisfirði

Frá fiskimjölsverksmiðjunni á Seyðisfirði.  Ljósm. Eyrún Guðmundsdóttir

Að sögn Gunnars Sverrissonar verksmiðjustjóra á Seyðisfirði hefur þar verið tekið á móti um 9.500 tonnum af kolmunna á vertíðinni. Beitir var að ljúka við að landa fullfermi, 2.100 tonnum, í morgun og Bjarni Ólafsson AK landaði rúmum 1.400 tonnum á laugardag. Vinnslan gengur mjög vel í verksmiðjunni og láta starfsmenn vel af sér.

Lesa meira...

Ágæt kolmunnaveiði eftir brælu

Sturla Þórðarson skipstjóri á Berki NK.  Ljósm. Þorgeir BaldurssonKolmunnaveiðin hefur verið að glæðast eftir enn eina bræluna á miðunum. Heimasíðan hafði samband við Sturlu Þórðarson skipstjóra á Berki NK og spurðist frétta af miðunum. Sturla sagði að veiðin hefði farið heldur rólega af stað eftir að veðrið gekk niður en nú væri ágætis veiði og talsvert að sjá. „Við byrjuðum að veiða á miðvikudagsmorgun en höfðum þá „slóað“ á miðunum í 12 tíma vegna veðurs. Í fyrsta holinu voru um 350 tonn en þá var híft eftir 17 tíma. Nú hafa hins vegar aflabrögðin breyst til hins betra og við vorum að taka 400 tonna hol eftir 5 tíma. Auðvitað vill maður alltaf betri veiði en það er varla ástæða til að kvarta undan núverandi aflabrögðum og útlitið er bara gott. Við erum komnir með 1400 tonn og vonandi fyllum við skipið með næsta holi“.

Góð veiði á Fætinum og vestur í Hvalbakshall

Aflinn ísaður um borð í Bjarti NK.  Ljósm. Þorgeir BaldurssonÍsfisktogarinn Bjartur NK kom inn úr veiðiferð á miðvikudagskvöld. Aflinn var um 90 tonn, mest þorskur. Veiðislóðin var sú sama og að undanförnu; á Fætinum og vestur í Hvalbakshall. Steinþór Hálfdanarson skipstjóri var ánægður með fiskiríið og sagði eftirfarandi í viðtali við heimasíðuna: „Þarna er búinn að vera nægur fiskur alllengi og það liggur við að við förum þarna og sækjum þann skammt sem okkur er ætlað að taka í hverri veiðiferð. Núna vorum við tvo daga að veiða í skipið og reyndar hefðum við getað tekið styttri tíma í það. Fiskurinn er hins vegar stærri núna en hann hefur verið að undanförnu og uppistaða aflans er þorskur sem er yfir þrjú kíló. Þetta er fallegur og góður fiskur sem hentar vel til vinnslu. Nú er ráðgert að halda til veiða á ný í fyrramálið og áformað að koma inn til löndunar á þriðjudag.“

Spariskipið Birtingur

Spariskipið Birtingur NK í höfn í Neskaupstað.  Ljósm. Þórhildur Eir Sigurgeirsdóttir
Birtingur NK liggur nú í Neskaupstað og hefur legið þar síðan loðnuvertíð lauk.  Hann fer í slipp til Akureyrar 6. maí og þá verður skipið meðal annars málað hátt og lágt.  Verktíminn í slippnum er áætlaður þrjár vikur.  Síðan verður skipinu lagt annaðhvort á Seyðisfirði eða Reyðarfirði og þar mun það bíða næsta verkefnis.  Í fyrra lá skipið á Seyðisfirði og önnuðust starfsmenn Síldarvinnslunnar þar eftirlit með því.
Eins og lesendum þessarar síðu er kunnugt hét Birtingur áður Börkur og hefur skipið verið í eigu Síldarvinnslunnar í 40 ár.  Skipið hefur ávallt verið einstakt happa- og aflaskip en nú má segja að það sé einungis gert út þegar kvóti er það mikill að önnur uppsjávarskip Síldarvinnslunnar, Börkur og Beitir, eiga í erfiðleikum með að ná honum.  Síldarvinnslan festi kaup á nýjum Berki í febrúar 2012 og þá fékk sá gamli nafnið Birtingur.  Þegar nýi Börkur kom stóð loðnuvertíð yfir og var kvótinn það ríflegur að Birtingur hélt áfram loðnuveiðum.  Á því ári fiskaði skipið alls 34.205 tonn af loðnu áður en því var lagt.  Birtingur hóf síðan á ný loðnuveiðar í febrúarmánuði s.l. og á nýliðinni vertíð bar hann 15.134 tonn að landi.

Ein stærsta útskipun ársins á frystri loðnu og frystur kolmunni kemur í staðinn

Green Guatemala að lesta frysta loðnu í Neskaupstað í dag.  Ljósm. Þórhildur Eir SigurgeirsdóttirNú liggur skipið Green Guatemala í höfninni í Neskaupstað og lestar frysta loðnu sem fer til Svartahafsins.  Um er að ræða eina stærstu útskipun ársins en skipið mun taka 5.000 tonn. Að sögn Heimis Ásgeirssonar yfirverkstjóra gengur lestun vel og fara um 1.000 tonn um borð í skipið á dag.

Í stað loðnunnar sem fer úr frystigeymslum Síldarvinnslunnar kemur frystur kolmunni. Vilhelm Þorsteinsson EA er væntanlegur seinni partinn á morgun með tæplega 600 tonn af frystum kolmunna og á fimmtudag er Hákon EA væntanlegur með um 750 tonn.

Heimir segir að miklar annir séu hjá starfsmönnum frystigeymslanna um þessar mundir og það sé svo sannarlega nóg að gera framundan.

Fínasta veiði á kolmunnamiðunum suður af Færeyjum

Börkur NK að landa kolmunna á Seyðisfirði í dag. Ljósm. Eyrún Guðmundsdóttir.Eftir að brælunni lauk á kolmunnamiðunum s.l. miðvikudag hefur verið fínasta veiði.  Börkur NK kom til Seyðisfjarðar klukkan eitt í nótt með fullfermi eða 1.800 tonn og Beitir NK er á landleið einnig með fullfermi eða 2.100 tonn.  Þegar rætt var við Hálfdan Hálfdanarson skipstjóri á Beiti um klukkan 10 í morgun sagði hann að þeir væru á leið til Seyðisfjarðar og ættu eftir 60-80 mílur í Norðfjarðarhorn. „Við verðum á Seyðisfirði í kvöld“, sagði Hálfdan,“það er búið að vera vitlaust veður á leiðinni en það er að ganga niður núna“. Hálfdan segir að eftir að brælunni á miðunum lauk sl. miðvikudag hafi almennt verið góð veiði hjá kolmunnaskipunum. Flest skipanna séu að fá 300-500 tonn í holi en misjafnt sé hve lengi er togað.  Stystu holin eru oft um 4 tímar en stundum er togað í allt að 10 tíma.  Veiðisvæðið er hið sama og verið hefur að undanförnu; um 90 mílur suður af Suðurey.  Fjarlægðin frá veiðisvæðinu í Norðfjarðarhorn er um 350 mílur og eru skipin um einn og hálfan sólarhring að sigla frá miðunum til Austfjarðahafna í góðu veðri.

Í Neskaupstað er búið að taka á móti um 8.300 tonnum af kolmunna til mjöl- og lýsisvinnslu ef talinn er með farmur Bjarna Ólafssonar AK sem nú er að landa.  Þá hefur einnig verið landað liðlega 1.450 tonnum af frystum kolmunna í Neskaupstað. 

Heimilað að veiða 15 þúsund tonn af makríl í grænlenskri lögsögu

Polar Amaroq.  Ljósm. Þórhildur Eir SigurgeirsdóttirFyrir nokkru ákváðu grænlensk stjórnvöld að heimila veiðar á 15 þúsund tonnum af makríl í grænlenskri lögsögu á komandi sumri.  Grænlendingar hafa farið þess á leit við íslensk stjórnvöld að fá að landa makrílnum á Íslandi og hefur verið fallist á að þeir fái að landa 12 þúsund tonnum hér á landi.
Í viðtali við Geir Zoëga skipstjóra á Polar Amaroq og áður skipstjóra á Eriku kom fram fyrir nokkru að vart hefði orðið við makríl í grænlenskri lögsögu í fyrra og hefði Erika m.a. veitt þar 2.500 tonn.  Nú hefur verið ákveðið að Íslendingar muni koma að rannsóknum á útbreiðslu makríls í grænlenskri lögsögu og er fyrirhugað að hafrannsóknaskipið Árni Friðriksson haldi þangað til rannsókna í sumar.
Grænlenska makrílkvótanum verður úthlutað til grænlenskra fyrirtækja en þau geta síðan framselt hann áfram til veiðiskipa.  Því er mögulegt að íslensk skip geti lagt stund á makrílveiðar innan grænlenskrar lögsögu á komandi sumri rétt eins og tveir togarar Brims gerðu um tíma s.l. sumar.

Góðir túrar hjá togurunum

Aðgerð um borð í Bjarti NK.  Ljósm. Þorgeir BaldurssonBjartur NK kom til hafnar í Neskaupstað í gær að aflokinni veiðiferð.  Aflinn var 93 tonn, þar af 83 tonn þorskur.
Barði NK kom að landi í dag með frystar afurðir að verðmæti tæplega 90 milljónir.  Uppistaða aflans er gullkarfi.
Bjartur heldur til veiða á ný sunnudaginn 28. apríl og er áætlað að hann landi fimmtudaginn 2. maí.  Barði heldur til veiða á úthafskarfa hinn 8. maí n.k.

Undirflokkar