Verður loðnuvertíð?

Nú ætti loðnuvertíð að vera að hefjast og loðnuspenningur í hámarki, en því er ekki að heilsa. Ekki er úr vegi að líta stuttlega yfir sögu loðnuveiðanna og velta fyrir sér þróuninni. 
 
Fyrstu fyrirliggjandi tölurnar um loðnuveiði við landið eru frá árinu 1963. Þá komu þúsund tonn á land. Loðnuveiðarnar fóru hægt af stað en jukust mikið eftir 1973, en þá berast yfir 400 þúsund tonn á land. Síðan fór aflinn upp undir milljón tonn árið 1979. Almennt mátti treysta á loðnuveiði þegar þarna var komið sögu en þó voru undantekningar frá því eins og á árinu 1982 þegar lítil loðna var veidd og á árinu 1991 þegar veiðin var ekki nema liðlega 250 þúsund tonn. Stærsta loðnuárið var hins vegar árið 1997 en þá komu 1,3 milljón tonn á land.
 
Síðustu ár hefur veiðin verið mun minni en áður. Árið 2009 fór veiðin niður í 14 þúsund tonn og frá þeim tíma má segja að loðnuvertíðir hafi verið svipur hjá sjón.
 
Nú er eðlilegt að spurt sé hverju er um að kenna? Hvers vegna skilar loðnan sér ekki eins og hún gerði áður? Er stærri þorskstofn að taka meira til sín? Hvaða áhrif hefur fjölgun hvala á stofninn? Er hlýnun sjávar að valda breytingum á göngumynstri loðnunnar?
 
Við upptöku á nýrri aflareglu á árinu 2015 lá fyrir að stórauka þurfti rannsóknir á loðnustofninum til að tryggja skynsamlega nýtingu hans til framtíðar. Loðnan hefur orðið verðmætari og verðmætari með aukinni áherslu á vinnslu hennar til manneldis og áhrif hennar í hagkerfinu hafa aukist. Loðnuhrogn seljast dýru verði og eins fryst hrygna ásamt því að verð á mjöli og lýsi hefur hækkað mikið. Samstarf útgerða og Hafrannsóknastofnunar við loðnurannsóknir undanfarinna ára hefur verið farsælt og hafa útgerðirnar samræmt búnað í skipum sínum við búnað hafrannsóknaskipanna þannig að þau megi nýta við rannsóknir og mælingar á stofninum.
 
Þrátt fyrir að hin nýja aflaregla kalli á auknar rannsóknir virðast menn ekki hafa gert ráð fyrir þeim kostnaðarauka sem auknar rannsóknir fela í sér. Nú er mikilvægt að menn setjist niður, fari yfir stöðu mála og geri áætlanir um loðnurannsóknir á komandi tímum. Það gengur ekki þegar komið er að loðnuvertíð að allt sé í óvissu varðandi það hver eigi að kosta rannsóknir á einhverjum dýrmætasta nytjastofni þjóðarinnar.
 
Hinn 7. janúar sl. náðist samkomulag um að Hafrannsóknastofnun greiði helming kostnaðar við loðnuleit og mælingar veiðiskipa. Munu útgerðirnar leggja til tvö skip sem munu leita með rannsóknaskipi Hafrannsóknastofnunar. Gert er ráð fyrir að leit hefjist eftir helgi og munu þá Hákon EA og Bjarni Ólafsson AK taka þátt í henni.  
 Á meðfylgjandi mynd má glögglega sjá þróun loðnuveiðanna við landið og hve þær hafa verið sveiflukenndar. Eins má sjá meðalveiði hvers áratugar og þá sést glögglega hve loðnuveiðin síðasta ártug hefur verið döpur miðað við hina fyrri. Mikið hefur verið gert á síðari árum til að auka hagkvæmni veiða og vinnslu. Sem dæmi má nefna að árið 2003 voru veiðiskipin 39 talsins en nú eru þau 17 og árið 2003 voru loðnuverksmiðjur 19 talsins en nú einungis 10. Þá hefur manneldisvinnsla aukist mikið og geta stærstu vinnslurnar fryst um 900 tonn á sólarhring.Á meðfylgjandi mynd má glögglega sjá þróun loðnuveiðanna við landið
og hve þær hafa verið sveiflukenndar. Eins má sjá meðalveiði
hvers áratugar og þá sést glögglega hve loðnuveiðin síðasta ártug
hefur verið döpur miðað við hina fyrri. Mikið hefur verið gert á
síðari árum til að auka hagkvæmni veiða og vinnslu. Sem dæmi má
nefna að árið 2003 voru veiðiskipin 39 talsins en nú eru þau 17 og
árið 2003 voru loðnuverksmiðjur 19 talsins en nú einungis 10. Þá hefur
manneldisvinnsla aukist mikið og geta stærstu vinnslurnar fryst um 900 tonn á sólarhring.
 

Eitt ár í nýjan Börk

Smíði á botneiningu í nýjan Börk NK. Ljósm. Hörður ErlendssonSmíði á botneiningu í nýjan Börk NK.
Ljósm. Hörður Erlendsson
Gert er ráð fyrir að nýr Börkur verði afhentur Síldarvinnslunni í janúarmánuði 2021 þannig að eitt ár mun líða þar til nýju skipi verður fagnað. Það eru ávallt tímamót þegar nýtt skip kemur í fyrsta sinn til heimahafnar og með hverju nýju skipi sem bætist í flota landsmanna eru stigin einhver framfaraskref.
 
Það er Skipasmíðastöðin Karstensens í Skagen í Danmörku sem annast smíði hins nýja Barkar en Börkur verður systurskip Vilhelms Þorsteinssonar sem einnig er í smíðum hjá stöðinni og mun væntanlega verða afhentur eiganda sínum í ágústmánuði nk. 
 
Miðskipseining, lestareining, í smíðum. Ljósm. Hörður ErlendssonMiðskipseining, lestareining, í smíðum.
Ljósm. Hörður Erlendsson
Skipasmíðastöð Karstensens hefur starfsstöðvar í Póllandi og þar er efnað niður í skipin og skrokkar þeirra smíðaðir. Síðan eru skrokkarnir dregnir til Skagen og þar er smíði skipanna lokið. Fyrir nokkru hófst smíði hins nýja Barkar í Gdynia og hafa fulltrúar Síldarvinnslunnar heimsótt stöðina þar og fræðst um hvernig að smíðinni er staðið. Í stöðinni er allt efni í skipið sniðið niður með hjálp tölvutækni og síðan vinnur mikill fjöldi manna við að setja einingarnar saman. 
 
Nýr Börkur er smíðaður með flotvörpu- og hringnótaveiðar í huga þannig að hann verður dæmigert uppsjávarveiðiskip. Mun hann leysa af hólmi núverandi Börk sem smíðaður var í Tyrklandi árið 2012. Nýi Börkur verður 88 m að lengd, 16,6 m að breidd og 9,6 m að dýpt. Stærð skipsins verður 4.100 brúttótonn. Aðalvélar í skipinu verða tvær, 3.200 ha hvor, en einnig verður í því 820 kw ásrafall. Rafall skipsins verður 3.500 kw og í því verða tvö kælikerfi, 1.500 kw hvort, til að kæla aflann. Kælitankar verða 13 talsins, alls 3.420 rúmmetrar. Í skipinu verða vistarverur fyrir 16 manns.
 
Þilfarseining í smíðum. Ljósm. Hörður ErlendssonÞilfarseining í smíðum. Ljósm. Hörður ErlendssonKnud Degn Karstensen framkvæmdastjóri skipasmíðastöðvarinnar segir að lengi hafi verið áhugi fyrir því hjá forsvarsmönnum hennar að smíða fiskiskip fyrir Íslendinga. Einungis eitt skip hafi verið smíðað hjá stöðinni fyrir íslenskt fyrirtæki áður en smíði Vilhelms Þorsteinssonar og Barkar hófst en það var Þórunn Sveinsdóttir VE. Annars hafa umsvif Skipasmíðastöðvar Karstensens verið mikil á síðustu árum og frá árinu 2007 hefur stöðin lokið smíði á milli 40 og 50 skipa af ýmsum gerðum. Er þar um að ræða fiskiskip, herskip og rannsóknaskip. Síðustu árin hefur stöðin afhent 5-6 nýsmíðuð skip árlega ásamt því að sinna viðhaldi og breytingum á fjölmörgum skipum. Það má því segja að umsvifin hjá Skipasmíðastöð Karstensens séu mikil. 
 
Þannig mun nýr Börkur NK líta út.Þannig mun nýr Börkur NK líta út.

Gullver kominn úr fyrsta túr ársins

Gullver NS landar á Seyðisfirði. Ljósm. Ómar BogasonGullver NS landar á Seyðisfirði. Ljósm. Ómar BogasonÍsfisktogarinn Gullver NS kom til heimahafnar á Seyðisfirði í gærkvöldi úr fyrsta túr ársins en skipið hélt til veiða 2. janúar sl. Aflinn í veiðiferðinni var 95 tonn, nánast eingöngu þorskur. Að sögn Rúnars L. Gunnarssonar skipstjóra var veitt í Seyðisfjarðardýpinu og undir lokin á Digranesflaki en leiðindaveður einkenndi túrinn. Fram kom að vart varð við loðnu í fiskinum sem Gullver fékk. 
 
Vegna veðurútlits er ekki gert ráð fyrir að Gullver haldi til veiða á ný fyrr en annað kvöld.
 
Vinnsla í frystihúsinu á Seyðisfirði hófst í gær að afloknu jóla- og áramótafríi. Til að byrja með var unninn ufsi en síðan verður unninn þorskur úr Gullver. Á árinu 2019 voru unnin 2.800 tonn af fiski í frystihúsinu á Seyðisfirði og er það svipað magn og unnið hefur verið þar síðustu árin.

Gott ár þrátt fyrir loðnuleysi

Aldrei hefur verið unninn jafn mikill makríll í fiskiðjuverinu í Neskaupstað og á síðasta ári. Ljósm. Hákon ErnusonAldrei hefur verið unninn jafn mikill makríll í fiskiðjuverinu í Neskaupstað og á síðasta ári. Ljósm. Hákon ErnusonHjá skipum Síldarvinnslunnar og dótturfélagsins Runólfs Hallfreðssonar ehf. gekk veiði á uppsjávartegundum vel á síðasta ári þrátt fyrir að engin loðna væri veidd. Þá var verð á uppsjávarafurðum hátt þannig að afkoman var með betra móti. Uppsjávarskip Síldarvinnslunnar eru þrjú talsins og var afli þeirra í síld, kolmunna og makríl sem hér segir:
 
  Heildarafli  Verðmæti
Beitir NK    44.448 tonn 1.526 mkr.
Börkur NK 43.435 tonn 1.537 mkr.
Bjarni Ólafsson AK    27.876 tonn 970 mkr.
 
Fiskiðjuver Síldarvinnslunnar í Neskaupstað vann 45.532 tonn af makríl og síld á síðasta ári og hefur aldrei áður verið unninn jafn mikill makríll í verinu.
 
Fiskimjölsverksmiðjan í Neskaupstað vann úr 97.000 tonnum af hráefni á árinu sem var að líða og verksmiðjan á Seyðisfirði úr 37.000 tonnum af kolmunna. 

Skipin halda til veiða á nýju ári

Gullver 2 jan 2019 OB

Gullver NS er fyrsta Síldarvinnsluskipið sem heldur til veiða á nýju ári. Ljósm: Ómar Bogason

                Nú að loknum jólum og áramótum halda skip Síldarvinnslunnar og dótturfélagsins Bergs-Hugins brátt til veiða. Gert er ráð fyrir að ísfisktogarinn Gullver NS láti úr höfn á Seyðisfirði klukkan tvö í dag og skip Bergs-Hugins í Vestmannaeyjum, Vestmannaey VE og Smáey VE, hefji veiðar á laugardag. Verið er að taka upp aðalvél frystitogarans Blængs NK og mun hann ekki halda á miðin fyrr en 10. janúar.

                Ekki hefur enn verið ákveðið hvenær uppsjávarskipin Beitir NK, Börkur NK og Bjarni Ólafsson AK halda til kolmunnaveiða í færeysku lögsögunni en veðurspá fyrir kolmunnamiðin er ekki góð.

Áramótakveðja

ÁramótakveðjaVið áramót er gott að líta yfir farinn veg og fara yfir atburði líðandi árs og á sama tíma að skerpa á þeirri framtíðasýn og væntingum sem við höfum til komandi árs. Eins og þið ættuð að þekkja þá er sjávarútvegur allt nema fyrirsjáanleg atvinnugrein og má líkja hverju ári í rekstri Síldarvinnslunnar við það að sitjast upp í nýjan og ólíkan rússíbana. Það eru margir óvissuþættir sem huga þarf að, verður loðna eða verður ekki loðna, hvernig verða aðstæður á mörkuðum, hvar verða gjöfulustu miðin þetta árið, óvissa í samningsmálum um deilistofna og svo margar aðrar utanaðkomandi breytur sem við getum ekki haft áhrif á en verðum einfaldlega að gera það besta úr sama hver niðurstaðan verður. 
 
Loðnubrestur markaði upphaf þessa árs. Þrátt fyrir þann mikla þunga, tíma og fjármuni sem að útgerðir settu í leit og mælingar á stofninum fylgdi brestinum mikið tekjutap fyrir starfsfólk, fyrirtæki, sjávarbyggðir og samfélagið allt. Þó svo að byrjun ársins væri erfið náðum við hins vegar að spila vel úr okkur spilum. Veiðar og vinnsla gengu vel, mjölmarkaðir voru hagfelldir framan af ári, öll okkar skip færðu gæðahráefni að landi sem að skilaði sér í mikilli verðmætasköpun. Upphafið að fyrirhugaðri endurnýjun á togarflota samstæðunnar varð loksins að veruleika þegar að dótturfélagi okkar Bergi - Hugin hf var afhent ný Vestmannaey og Bergey sl. sumar og vinnum við núna að því að koma þeim á veiðar með þeim framúrskarandi mannskap sem þar er um borð. Smíði á nýjum Berki hófst á árinu og höfum við einnig unnið að endurbótum á landvinnslunni með það í huga að skapa aukin verðmæti úr hverju kílói sem við drögum úr sjó. 
 
Það má segja að síðustu mánuðir ársins hafi verið erfiðir fyrir sjávarútveginn þegar þungar ásakanir voru bornar á íslenskt sjávarútvegsfyrirtæki vegna starfsemi þess á erlendri  grund.   Risu margir upp með yfirlýsingar um að gjörbylta þyrfti íslenskri fiskveiðilöggjöf vegna þessa. Ég tel slíka umræðu ekki byggða á neinum skynsamlegum rökum enda hefur íslenska fiskveiðistjórnunnarkerfið verið forsenda þess að við höfum skipað okkur í fremstu röð á meðal fiskveiðiþjóða í heiminum. Á sama tíma eru brýnir hagsmunir fyrir greinina og fyrirtækið sem um ræðir að ásakanirnar verði rannsakaðar og leiddar til lykta af viðeigandi yfirvöldum. 
 
Við erum ekki einungis að sigla inn í nýtt ár heldur erum við að sigla inn í nýjan áratug. Við getum verið stolt af þeim árangri sem við náðum sl. áratug og tel ég Síldarvinnslunna hafa skipað sér í hóp öflugustu fyrirtækja landsins. Lykillinn að árangrinum eru þeir framúrskarandi starfsmenn sem starfa hjá fyrirtækinu og fjölskyldur þeirra. Nýr áratugur mun fela í sér fjölbreytt og spennandi tækifæri sem munu fylgja ýmsar áskoranir. Það er undir okkur komið að nýta þau tækifæri til hins ítrasta til verðmætasköpunar fyrir land og þjóð. 
 
Kæru samstarfsmenn ég þakka ykkur fyrir samstarfið á liðnu ári og óska ykkur farsældar á því nýja og hlakka til þess að vinna að spennandi verkefnum með ykkur öllum á komandi ári.
 
Kveðja
Gunnþór Ingvason
 

Jólakveðja

Jolakveðja

Jólaball Síldarvinnslunnar

Jólasveinar munu koma í heimsókn á jólaballiðJólasveinar munu koma í heimsókn á jólaballiðHið árlega jólaball Síldarvinnslunnar verður haldið í Nesskóla í Neskaupstað laugardaginn 28. desember og hefst kl. 16. Samkvæmt hefðinni er ballið haldið í samvinnu við 9. bekk Nesskóla. Öllum börnum og foreldrum í Fjarðabyggð er boðið á ballið og er aðgangur ókeypis. Dansað verður í kringum jólatré við undirleik og söng og auðvitað munu jólasveinar koma í heimsókn. Fyrir mörg börn er jólaballið fastur liður á jólahátíðinni og skemmta þau sér gjarnan afar vel.

 

 

 

 

Erfiður túr en metár hjá Blængi

Árið 2019 er metár hjá Blængi NK. Ljósm. Smári GeirssonÁrið 2019 er metár hjá Blængi NK. Ljósm. Smári GeirssonFrystitogarinn Blængur NK er að landa í Neskaupstað í síðasta sinn á þessu ári. Aflinn í veiðiferðinni var rúmlega 900 tonn en skipið millilandaði 520 tonnum 28. nóvember. Heildarverðmæti aflans í veiðiferðinni var 282 milljónir króna. Bjarni Ólafur Hjálmarsson var skipstjóri fyrri hluta veiðiferðarinnar en Theodór Haraldsson síðari hlutann. Heimasíðan ræddi við Theodór og spurði hvernig síðari hluti veiðiferðarinnar hefði gengið. „Þetta gekk alls ekki vel. Síðari hlutinn var 19 dagar og þar af fóru fimm sólarhringar í keyrslu og flótta undan veðri. Við lágum í sólarhring í vari undir Grænuhlíð og í höfn í Hafnarfirði vorum við í tvo sólarhringa. Þetta var stanslaus bölvaður flótti. Við reyndum fyrst við ufsa úti fyrir Norðurlandi og síðan á Halamiðum. Síðustu dagana var svo farið í karfa. Við veiddum gullkarfa á Jökultungunni og það gekk þokkalega, en síðan var farið í djúpkarfa í Skerjadýpi og Grindavíkurdýpi en það gekk ekki nógu vel. Almennt má segja að þessi hluti veiðiferðarinnar hafi einkennst af brælu og flótta undan veðri en á móti kemur að það var blíða í fyrri hluta hennar,“ segir Theodór. 
 
Árið sem nú er að líða er langbesta ár Blængs bæði hvað varðar aflamagn og aflaverðmæti. Aflinn á almanaksárinu er tæp 7.100 tonn og verðmæti hans eru 2.100 milljónir króna. Skipstjórarnir á Blængi, þeir Bjarni Ólafur Hjálmarsson og Theodór Haraldsson, eru afar ánægðir með árið, en þeir benda á að þetta sé fyrsta heila árið sem Blængur er gerður út. Einhverjar frátafir frá veiðum hafa einkennt fyrri ár vegna framkvæmda við skipið. Fullvíst má telja að afli Blængs á árinu sé mesti ársafli austfirsks togara.
 

Verðmætin aukast hjá Gullver

Gullver NS kominn í jólafrí ljósum prýddur. Ljósm. Ómar BogasonGullver NS kominn í jólafrí ljósum prýddur.
Ljósm. Ómar Bogason
Ísfisktogarinn Gullver NS landaði í síðasta sinn á árinu sl. þriðjudag. Skipið var með fullfermi eða 106 tonn og var þorskur uppistaða aflans. Árið hefur verið afar gott hjá Gullver. Heildaraflinn á árinu nemur 6.090 tonnum og er verðmæti aflans 1.415 milljónir króna. Ársafli skipsins er 28 tonnum minni en í fyrra en það ár var það langbesta í sögu skipsins hvað afla varðar. Verðmæti skipsins í ár eru hins vegar 190 milljónum króna meiri en á síðasta ári. Það verður því vart annað sagt en að ársútkoman hjá Gullversmönnum sé glæsileg.
 
Skipstjórar á Gullver eru Þórhallur Jónsson og Rúnar L. Gunnarsson. Í spjalli við Rúnar kom fram að ánægja ríkti með árið. „Þetta er afar fínt ár sem nú er að kveðja, en þó dró aðeins úr aflabrögðunum undir lok ársins. Menn verða að vera afar ánægðir með útkomuna. Það er vart hægt að biðja um mikið betra,“ segir Rúnar.
 

Síðustu kolmunnalandanirnar á árinu

Kolmunna dælt um borð í Beiti NK. Ljósm. Helgi Freyr ÓlasonKolmunna dælt um borð í Beiti NK.
Ljósm. Helgi Freyr Ólason
Kolmunnaveiði í færeysku lögsögunni hófst síðari hluta nóvembermánaðar og þessa dagana eru Síldarvinnsluskipin að landa síðustu förmunum fyrir hátíðarnar. Bjarni Ólafsson AK landaði 370 tonnum sl. mánudag en hann þurfti að koma í land vegna smávægilegrar bilunar. Í gær var landað tæpum 1.760 tonnum úr Beiti NK og Börkur NK kom í nótt með 2.200 tonn.
 
Alls hafa 13.250 tonn af kolmunna borist til fiskimjölsverksmiðju Síldarvinnslunnar í Neskaupstað frá því veiðar hófust í nóvember. Segir Hafþór Eiríksson verksmiðjustjóri að lokið verði við að vinna kolmunnann um helgina.
 
 
 

Met í afla og verðmætum

Vestmannaey VE kemur til löndunar í gær. Ljósm. Guðmundur Alfreðsson Vestmannaey VE kemur til löndunar í gær.
Ljósm. Guðmundur Alfreðsson
Ánægðir sjómenn að loknu vel heppnuðu ári. Ljósm. Guðmundur AlfreðssonÁnægðir sjómenn að loknu vel heppnuðu ári.
Ljósm. Guðmundur Alfreðsson
Á árinu sem nú er að líða hafa skip Bergs-Hugins aflað 10.300 tonna að verðmæti 2.760 milljónir króna. Er þetta mesti afli sem skip félagsins hafa komið með að landi á almanaksári og einnig mesta aflaverðmæti. Aflinn eykst um 150 tonn á milli ára og verðmætin um 350 milljónir.
 
Í júlímánuði sl. fékk Bergur-Huginn afhent nýtt skip sem fékk nafnið Vestmannaey og í kjölfar þess fékk gamla Vestmannaey nafnið Smáey. Bergey var seld til Grundarfjarðar sl. haust og fluttist þá áhöfn hennar yfir á Smáey. Ný Bergey var síðan afhent félaginu 1. október sl. og mun hún hefja veiðar eftir áramót.
 
Á árinu fiskaði Bergey 4.414 tonn að verðmæti 1.140 milljónir, Smáey (áður Vestmannaey) fiskaði 5.232 tonn að verðmæti 1.420 milljónir og nýja Vestmannaey fiskaði 655 tonn að verðmæti 200 milljónir króna. Afli Smáeyjar (áður Vestmannaey) er mesti afli sem eitt skip Bergs-Hugins hefur aflað á almanaksári en í fyrra aflaði Bergey 5.230 tonna þannig að það munar 2 tonnum.
 
Vestmannaey landaði fullfermi í Vestmannaeyjum í gær og Smáey er að landa í dag. Áhafnir skipanna munu nú fá jólafrí eftir afar gott ár.
 
 
 
 
 
 

Tveir miðar á verði eins

Tveir miðar á verði einsMánudagskvöldið 16. desember kl. 20 verður boðið upp á glæsilega jólatónleika í Egilsbúð í Neskaupstað. Fram munu koma söngvararnir Pálmi Gunnarsson og Guðrún Gunnarsdóttir ásamt Unni Birnu Björnsdóttir sem er þjóðþekkt fyrir söng og fiðluleik. Úrvalshljómsveit mun annast hljóðfæraleikinn á tónleikunum.
                
Síldarvinnslan hefur ákveðið að hvetja starfsfólk sitt til að sækja tónleikana og er því boðið að fá tvo aðgöngumiða á verði eins. Til að komast í almennilegt jólaskap er ekkert betra en að sækja góða og ljúfa jólatónleika.
                
Starfsmenn fara inn á  Eastland.is/svn  og skrá sig fyrir miðum, upphæðin verður síðan skuld færð með næsta launauppgjöri.
 
 
 
 

Skipin halda til veiða eftir hvellinn

Kolmunnaskipin hafa hafið veiðar að lokinni brælu. Ljósm. Helgi Freyr ÓlasonKolmunnaskipin hafa hafið veiðar að lokinni brælu. Ljósm. Helgi Freyr ÓlasonGert er ráð fyrir að ísfisktogarar Síldarvinnslunnar og Bergs-Hugins haldi til veiða í kvöld eða fyrramálið. Gert er ráð fyrir að lægji með nóttinni og þá skapist einhver friður til veiða. Frystitogarinn Blængur NK hélt til veiða frá Hafnarfirði í gær.
 
Kolmunnaskipin hafa hafið veiðar austur af Færeyjum en þau höfðu leitað vars vegna veðurs. Börkur NK fór út í gærdag og Beitir NK í gærkvöldi. Bjarni Ólafsson AK er einnig kominn á miðin að lokinni löndun. Að sögn Sigurðar Valgeirs Jóhannessonar, stýrimanns á Beiti, er komið ágætis veður á miðunum en það er rólegt yfir veiðinni. Segir hann að öll íslensku kolmunnaskipin séu að toga á 20 fermílna svæði. „Það hefur verið rysjótt tíðin hérna að undanförnu og veiðarnar hafa gengið í samræmi við það,“ segir Sigurður.
 
 
 
 
 
 
 

Veður truflar veiðar

Vont veður truflar veiðar. Blængur NK í brælu. Ljósm. Hákon SeljanVont veður truflar veiðar. Blængur NK í brælu.
Ljósm. Hákon Seljan
Óhagstætt veður truflar veiðar Síldarvinnsluskipa mjög um þessar mundir. Blængur NK er kominn til hafnar í Hafnarfirði og mun bíða þess að ofsaveðrið sem spáð er gangi niður. Ísfisktogararnir, Gullver NS, Smáey VE og Vestmannaey VE, eru allir á Austfjarðamiðum en gert er ráð fyrir að þeir muni halda til hafnar upp úr hádegi á morgun því þá mun vonskuveðrið ná austur samkvæmt spá.  Vestmannaey landaði reyndar 60 tonnum á Seyðisfirði í gærkvöldi og hélt til veiða strax að löndun lokinni.
 
Kolmunnaskipin, sem eru að veiðum í færeysku lögsögunni, liggja í vari eða eru á leiðinni í var þannig að veðurofsi truflar einnig veiðar á þeim miðum.
 
 

Smáey gerði það gott í byrjun vikunnar

Landað úr Smáey VE sl. mánudagskvöld. Ljósm. Guðmundur AlfreðssonLandað úr Smáey VE sl. mánudagskvöld.
Ljósm. Guðmundur Alfreðsson
Að undanförnu hafa togarar ekki fiskað neitt sérstaklega vel á miðunum við landið en annað slagið hafa þó komið ágæt skot. Smáey VE gerði það gott í byrjun vikunnar en þá fékk skipið fullfermi af karfa og ufsa á skömmum tíma. Heimasíðan hafði samband við Ragnar Waage skipstjóra á Smáey til að fá nánari fréttir um umrædda veiðiferð. „Við létum úr höfn í Vestmannaeyjum klukkan 4.45 á sunnudagsmorgun og komum til hafnar klukkan 8 á mánudagskvöld með fullfermi eða 70 tonn af karfa og ufsa. Aflinn fékkst í Reynisdýpinu eða suður af Hjörleifshöfða en þangað er um fjögurra tíma stím frá Eyjum. Þarna fékkst mest ufsi yfir nóttina en karfi yfir daginn og það fiskaðist býsna vel. Það hefur ekki verið neitt sérstakt fiskirí úti fyrir suðurströndinni að undanförnu en af og til gengur þetta vel. Við fórum aftur út klukkan 10 á mánudagskvöld og vorum þá í djúpkarfa á Sneiðinni sunnan við Eyjar. Þar var öllu rólegra og við lönduðum um 25 tonnum á miðvikudagskvöldið,“ segir Ragnar.
 
Það er áhöfnin á Bergey VE sem rær á Smáey um þessar mundir en hin nýja Bergey er á Akureyri þar sem verið er að ganga frá millidekki skipsins. Gert er ráð fyrir að Bergey haldi til veiða fljótlega eftir áramótin. 

Kolmunninn er úrvalshráefni

received 10209119174272136

Beitir NK með gott kolmunnahol. Ljósm. Helgi Freyr Ólason

                Skip Síldarvinnslunnar hófu kolmunnaveiðar í færeysku lögsögunni í síðasta mánuði og hafa Bjarni Ólafsson AK og Beitir NK þegar landað fyrstu förmunum í Neskaupstað. Heimasíðan hafði samband við Hafþór Eiríksson verksmiðjustjóra og spurði hvernig hráefni kolmunninn væri. „Í einu orði sagt þá er hann úrvalshráefni. Þetta er stór og góður fiskur og hann er vel feitur á þessum árstíma. Kolmunninn gefur vel af mjöli og einnig talsvert af lýsi núna. Vinnslan á honum gengur vel en það eru komin á land hátt í 5.000 tonn. Börkur NK er síðan á landleið með 2.000 tonn og kemur til hafnar síðar í dag. Bjarni Ólafsson og Beitir eru á miðunum,“ segir Hafþór.

                Í dag er bræla á kolmunnamiðunum fyrir austan Færeyjar.

Beitir með 3.100 tonn af kolmunna

Beitir 02.12

Beitir NK siglir inn Norðfjörð í morgun með 3.100 tonn af kolmunna. Ljósm. Smári Geirsson.

Beitir NK kom til Neskaupstaðar í morgun með 3.100 tonn af kolmunna sem fékkst austur af Færeyjum. Heimasíðan ræddi við Sturlu Þórðarson skipstjóra og spurði hvort mikið af fiski væri að sjá á veiðisvæðinu. „Það eru einhverjar breiður þarna en það var enginn svakalegur kraftur í veiðunum. Við vorum átta daga að veiðum og fengum aflann í átta eða níu holum. Mest fengum við 480-490 tonn í holi en yfirleitt var lengi dregið. Við drógum upp í 22 tíma. Venjulega var kastað seinni part dags og híft morguninn eftir. Stærsti plúsinn við túrinn var veðrið, en það var blíða hvern einasta dag. Fiskurinn er að ganga í austur og undir lokin vorum við komnir alveg að ensku línunni,“ segir Sturla.

                Beitir hefur alloft áður komið með kolmunnafarma að landi sem hafa verið yfir 3.000 tonn en ekkert annað íslenskt fiskiskip hefur komið með svo mikinn afla að landi í veiðiferð. Mestum afla í einni veiðiferð hjá skipinu var landað 20. apríl sl., 3.212 tonnum.

Blængur millilandar

Capture

Landað úr Blængi NK í dag.Ljósm. Smári Geirsson.

                Frystitogarinn Blængur NK millilandar í Neskaupstað í dag. Afli skipsins er um 520 tonn upp úr sjó að verðmæti um 160 milljónir króna. Bjarni Ólafur Hjálmarsson skipstjóri segir að það hafi verið fínasta kropp í túrnum fram að þessu. „Við héldum til veiða 8. nóvember og síðan eru liðnir 20 dagar. Túrnum á ekki að ljúka fyrr en 18. desember. Í dag verður landað 16.000 kössum úr skipinu og er ufsi uppistaða aflans. Haldið verður á ný til veiða strax að  löndun lokinni. Í þessum túr hefur verið veitt frá Langanesi og vestur í Víkurál og vonandi verða aflabrögð áfram þokkaleg þannig að árinu ljúki á góðum nótum,“ segir Bjarni Ólafur.

                Theodór Haraldsson mun leysa Bjarna Ólaf af í síðari hluta veiðiferðarinnar.

Fyrsti kolmunnafarmurinn

Bó

Bjarni Ólafsson AK siglir inn Norðfjörð með fyrsta kolmunnafarm vetrarins. Ljósm: Smári Geirsson

                Fyrsti kolmunnafarmurinn á þessum vetri barst til Neskaupstaðar í morgun en þá kom Bjarni Ólafsson AK með 1.800 tonn. Gísli Runólfsson segir að þeir á Bjarna Ólafssyni hafi komið með fyrsta vetrarfarminn í fyrra um sama leyti. „Við héldum til veiða 16. nóvember og til að byrja með fór mikill tími í að leita. Í fyrstu var aflinn tregur. Við vorum að draga í 20 tíma og fengum gjarnan innan við 200 tonn í holi og allt niður í 60 tonn. Síðan fór þetta að ganga betur og í lokaholinu fengum við 300 tonn eftir að hafa dregið í sjö og hálfan tíma. Þarna var veiðin að byrja af einhverju viti. Við fengum aflann norðaustur af Færeyjum og það var samfelld blíða allan túrinn. Þetta var eins og á besta sumardegi, „ segir Gísli.

                Auk kolmunnans hefur íslensk sumargotssíld borist til Neskaupstaðar að undanförnu. Margrét EA landaði um 1.000 tonnum í gær og Börkur NK er að landa 1.300 tonnum.

Undirflokkar