Áhrif loðnubrests í Fjarðabyggð eru mikil og víðtæk

Loðnubrestur mikil áhrif á tekjur starfsmanna í sjávarútvegi.Loðnubrestur mikil áhrif á tekjur starfsmanna í sjávarútvegi.Fjármálastjóri Fjarðabyggðar hefur tekið saman greinargerð um áhrif loðnubrests á sveitarfélagið. Hér skulu birtar nokkrar lykilupplýsingar sem fram koma í greinargerðinni.
 
  • Í Fjarðabyggð var tekið á móti 47% alls loðnuafla á árinu 2018 en á síðustu fimm árum hefur þetta hlutfall verið á bilinu 34% - 47%.
  • Útflutningsverðmæti þeirrar loðnu sem unnin var í Fjarðabyggð á árinu 2018 nam um tíu milljörðum króna.
  • Loðnubrestur mun lækka launatekjur starfsmanna í sjávarútvegi um rúmlega 13% frá árinu 2018 og að öðru óbreyttu munu launatekjur íbúa sveitarfélagsins lækka um 5% eða um 1,25 milljarð króna.
  • Að öðru óbreyttu mun loðnubrestur leiða til þess að tekjur stóru sjávarútvegsfyrirtækjanna í sveitarfélaginu dragist saman um fimmtung frá árinu 2018.
  • Gera má ráð fyrir að velta fyrirtækja sem þjóna sjávarútvegnum beint lækki um nálægt 600 milljónum króna.
  • Samdrátturinn vegna loðnubrestsins mun hafa smitandi áhrif um allt samfélagið. Til dæmis mun draga úr fjárfestingum og þjónustukaupum. Eins mun áhrifa án efa gæta á fasteignamarkaði.
  • Gera má ráð fyrir að staðgreiðslutekjur sveitarfélagsins Fjarðabyggðar lækki um 160 milljónir króna á milli ára vegna loðnubrests. Þá má gera ráð fyrir að tekjur hafnarsjóðs lækki um 100 milljónir. Þannig munu heildartekjur sveitarfélagsins lækka um 260 milljónir króna ef engin loðna veiðist.
 
Enn er loðnu leitað og enn er haldið dauðahaldi í þá von að nægjanleg loðna finnist til að unnt sé að heimila einhverjar veiðar. Hafa skal í huga að verðmætasti hluti hverrar vertíðar er undir lokin þegar hrognavinnsla fer fram. 

Síldarvinnslan hefur tekið á móti um 23.000 tonnum af kolmunna og rúmlega 5.000 tonn eru á leiðinni

Beitir NK með 590 tonna hol á síðunni á miðunum vestur af Írlandi. Ljósm. Helgi Freyr ÓlasonBeitir NK með 590 tonna hol á síðunni á miðunum
vestur af Írlandi. Ljósm. Helgi Freyr Ólason
Kolmunnaveiðin vestur af Írlandi hefur gengið vel að undanförnu þegar veður hefur ekki hindrað veiðar. Síðustu daga hafa skip landað afla í fiskimjölsverksmiðjur Síldarvinnslunnar, bæði í Neskaupstað og á Seyðisfirði. Hákon EA landaði um 1.600 tonnum í Neskaupstað sl. föstudag og Margrét EA tæplega 2.000 tonnum á sunnudag. Bjarni Ólafsson landaði síðan tæplega 1.700 tonnum á Seyðisfirði í gær.
 
Nú hafa verksmiðjur Síldarvinnslunnar tekið á móti tæplega 23.000 tonnum af kolmunna á árinu. Alls hefur 17.600 tonnum verið landað í Neskaupstað og 5.200 tonnum á Seyðisfirði. Síðan er von á rúmlega 5.000 tonnum til viðbótar í dag; Beitir NK er væntanlegur til Neskaupstaðar með rúmlega 3.000 tonn og Börkur NK til Seyðisfjarðar með tæplega 2.200 tonn.
 
Verskmiðjustjórarnir, Hafþór Eiríksson í Neskaupstað og Gunnar Sverrisson á Seyðisfirði, segja að mjög gott sé að vinna kolmunnann sem berst að landi. Hráefnið sé eins og best verður á kosið. Það sé vel kælt um borð í skipunum og fiskurinn sé sæmilega feitur og vel á sig kominn.

Svipaður afli og í fyrra hjá Eyjunum

Bergey VE. Ljósm. Guðmundur AlfreðssonBergey VE. Ljósm. Guðmundur AlfreðssonÞað sem af er ári hefur afli hjá Vestmannaey VE og Bergey VE verið svipaður og á sama tíma í fyrra. Janúar var hagstæður veðurfarslega og þá veiddu skipin rétt tæplega 800 tonn og var uppistaða aflans þorskur og ýsa. Til samanburðar var veiðin um 750 tonn í janúar í fyrra.
 
Yfirstandandi febrúarmánuður hefur aftur á móti verið erfiður veðurfarslega og hefur þess vegna ekki verið unnt að sækja á þau mið sem venjulega er veitt á um þetta leyti árs. Þrátt fyrir ótíðina hafa skipin þó fiskað svipað magn í mánuðinum og í fyrra eða 950 tonn. Að undanförnu hefur mest verið fiskað við Vestmannaeyjar og þá einkum hlémegin við eyjarnar. Síðan hefur verið skotist inn og landað í brælustoppum. Á þessum miðum fæst í reynd ekkert nema þorskur en reynt er að skjótast annað þegar færi gefst til að ná í aðrar tegundir. Sl. sunnudag og mánudag náðist til dæmis að kroppa í ufsa og karfa á miðum fyrir austan Vík.

Þetta eru reffilegustu bátar

Í skipasmíðastöð Vard í Aukra. Talið frá vinstri: Einar Örn Þórsson yfirvélstjóri á Vestmannaey, Guðmundur Alfreðsson útgerðarstjóri, Birgir Þór Sverrisson skipstjóri á Vestmannaey, Hákon Seljan yfirvélstjóri á Bergey og Jón Valgeirsson skipstjóri á Bergey. Á bakvið sjást Vestmannaey og Bergey í smíðum.Í skipasmíðastöð Vard í Aukra. Talið frá vinstri: Einar Örn
Þórsson yfirvélstjóri á Vestmannaey, Guðmundur
Alfreðsson útgerðarstjóri, Birgir Þór Sverrisson skipstjóri
á Vestmannaey, Hákon Seljan yfirvélstjóri á Bergey og
Jón Valgeirsson skipstjóri á Bergey. Á bakvið sjást
Vestmannaey og Bergey í smíðum.
Þessa dagana eru skipstjórar og yfirvélstjórar Vestmannaeyjar VE og Bergeyjar VE ásamt Guðmundi Alfreðssyni útgerðarstjóra Bergs-Hugins í Noregi til að fylgjast með smíði nýrra skipa sem eiga að leysa núverandi skip útgerðarfélagsins af hólmi. Skipin eru smíðuð hjá skipasmíðastöð Vard í Aukra sem er skammt frá bænum Molde. Heimasíðan ræddi við Birgi Þór Sverrisson skipstjóra á Vestmannaey og Jón Valgeirsson skipstjóra á Bergey og spurði þá hvernig þeim litist á skipin. Birgir Þór sagði að sér litist afskaplega vel á skipin og hvernig staðið væri að smíði þeirra. „Hérna er mjög vel staðið að öllu og segja má að allt sé fyrsta flokks og það er mjög gott að fá tækifæri til að koma hér og benda á ýmislegt sem maður vill leggja áherslu á. Þessi skip eru í rauninni stór-lítil ef svo má að orði komast. Þau eru stutt, eða tæplega 29 metrar að lengd, en þau eru 12 metra breið og há. Menn eru mjög spenntir að fá þessi nýju skip í hendurnar en þau verða væntanlega afhent í sumar,“ segir Birgir.
 
Jón Valgeirsson skipstjóri á Bergey tekur undir með Birgi og segir að það sé afar gott að fá tækifæri til að koma með fáeinar ábendingar á meðan unnið er að smíðinni. „Ég er mjög ánægður með allt sem ég hef séð hér og mér sýnist þetta vera verklegir og hinir reffilegustu bátar. Það er komin allgóð heildarmynd á Vestmannaey en smíðin á Bergey er skemmra á veg komin, það var verið að hífa nefið á hana núna. Menn bíða spenntir eftir að fá þessi skip. Um borð í þeim verður betri aðbúnaður en í gömlu skipunum og aðstaða á millidekki verður miklu betri. Þá verður allt hljóðlátt um borð vegna þess að spilin verða rafmagnsknúin. Ég hef mikla trú á þessum skipum og það verður gaman að upplifa nýjungar eins og til dæmis tvær skrúfur,“ sagði Jón.

Hurðalaust helvítis rok

Trollið tekið á Gullver NS. Ljósm. Þorgeir BaldurssonTrollið tekið á Gullver NS. Ljósm. Þorgeir BaldurssonHeimasíðan hafði samband við ísfisktogarann Gullver NS í morgun og ræddi við Rúnar L.  Gunnarsson skipstjóra og Steinþór Hálfdanarson stýrimann. Fyrst var spurt um fiskirí frá áramótum og sagði Rúnar skipstjóri að það hefði verið þokkalegt. „Við höfum töluvert verið að veiða á Digranesflakinu og Langanesgrunni en þar hefur verið hægt að fá þorsk. Reyndar var ýsa suður frá á okkar hefðbundnu miðum í byrjun mánaðarins en þar er nú lítinn þorsk að hafa. Þorskurinn er þar úttroðinn af loðnu og er að elta hana. Það gekk vel að fiska í janúar en þá náðum við um 500 tonnum í sjö túrum. Veðrið hefur hins vegar sett strik í reikninginn núna í febrúarmánuði,“ sagði Rúnar.
 
Steinþór stýrimaður tekur undir það að veðurlagið í febrúar hafi verið leiðinlegt. „Það hefur verið mikill lægðagangur og sífelldar umhleypingar í febrúar en janúar var hins vegar býsna góður hvað veður varðar hérna fyrir austan. Núna er til dæmis hurðalaust helvítis rok. Við erum austur úr Gerpi og erum að dóla upp undir landið. Ætlunin er að fara norðureftir, það mun hægja fyrr fyrir norðan. Við eigum að landa á fimmtudag og erum komnir með rúmlega 40 tonn,“ sagði Steinþór.

Kolmunnaskip með góðan afla

Kolmunna landað úr Margréti EA í gær. Ljósm. Smári GeirssonKolmunna landað úr Margréti EA í gær.
Ljósm. Smári Geirsson
Um helgina hafa þrjú kolmunnaskip landað afla í fiskimjölsverksmiðjur Síldarvinnslunnar í Neskaupstað og á Seyðisfirði. Beitir NK kom fyrstur aðfaranótt föstudagsins og landaði 2.750 tonnum í Neskaupstað. Margrét EA kom í kjölfar hans til Neskaupstaðar aðfaranótt sunnudagsins með 1.850 tonn og Bjarni Ólafsson AK kom til Seyðisfjarðar skömmu síðar með um 1.800 tonn.
 
Heimasíðan ræddi stuttlega við Tómas Kárason skipstjóra á Beiti og spurði hann hvernig veiðiferðin hefði gengið. „Veiðiferðin gekk í sjálfu sér vel þegar við gátum verið að. Við fengum aflann í tíu holum en veðrið var afskaplega leiðinlegt og gerði okkur erfitt fyrir. Það var nægur fiskur þarna á miðunum vestur af Írlandi en það virðist þó vera enn meiri fiskur innan línunnar þar sem við getum ekki veitt. Fiskurinn gengur þarna út úr lögsögunni og síðan inn í hana aftur og við verðum að taka hann á meðan hann er utan línunnar. Holin hjá okkur gáfu misjafnan afla en í síðasta holinu fengum við 470 tonn eftir að hafa einungis dregið í nokkrar mínútur. Það var veisla. Þó nokkur fjöldi skipa er að veiðum innan línunnar og eru það helst Danir, Norðmenn og Hollendingar. Einhverntímann í marsmánuði fer kolmunninn að ganga norður eftir og heldur sig þá mikið innan færeyskrar lögsögu. Við erum bjartsýnir á að unnt verði að fara þó nokkra túra á miðin þarna vestur af Írlandi áður en hann fer að ganga norður eftir fyrir alvöru. Það er verst hve langt er á þessi mið en þegar við lögðum af stað til löndunar voru 618 mílur heim,“ segir Tómas.
 
Börkur NK er nú á landleið af kolmunnamiðunum með 2.200 tonn og mun löndun úr honum væntanlega hefjast um hádegisbil á morgun.

Japanskir loðnukaupendur áhyggjufullir

Japanskir loðnukaupendur

Fulltrúar Síldarvinnslunnar ásamt japönskum loðnukaupendum í Neskaupstað. Fremst sitja Masayuki Okada og Gunnþór Ingvason framkvæmdastjóri Síldarvinnslunnar. Ljósm: Smári Geirsson                

Þessa dagana dvelja fulltrúar fjögurra japanskra fyrirtækja í Neskaupstað og bíða frétta af loðnuleit. Þeir segja að það sé grafalvarlegt mál ef engin íslensk loðna kemur inn á markaðinn í ár en japanskir neytendur þekkja loðnuna frá Íslandi sem gæðavöru. Í fyrra keyptu japönsk fyrirtæki 20.000 tonn af loðnu frá Íslandi auk þess sem Japanir eru helstu kaupendur loðnuhrogna. Í Japan fer loðnan  öll til manneldis og fyrir hana fást góð verð, en Síldarvinnslan hefur verið stærsti íslenski framleiðandinn á loðnu inná Japansmarkað.

                Heimasíðan ræddi við þrjá Japani sem nú dvelja í Neskaupstað til þess að fræðast um þeirra sýn á þá alvarlegu stöðu sem nú blasir við hvað loðnuna varðar. Enn er leitað að loðnu en ekki hefur mælst nægjanlegt magn til að unnt sé að ákveða kvóta og hefja veiðar. Japanirnir sem rætt var við eru Takaho Kusayanagi og Hiroaki Takahasi sem báðir starfa hjá fyrirtækinu K&T Inc. sem sérhæfir sig í að kaupa fisk til Japan og selja hann síðan fyrirtækjum sem vinna hann fyrir neytendamarkað. Þriðji Japaninn sem rætt var við er Masayuki Okada en hann kemur frá fyrirtækinu Okada Suisan sem meðal annars sérhæfir sig í að vinna fisk fyrir neytendamarkað. Okada Suisan rekur vinnslustöðvar í Japan, Kína, Indónesíu og Tælandi og eru starfsmenn þeirra samtals rúmlega 1.100. Allir þrír viðmælendur heimsíðunnar eru gjörkunnugir á Íslandi. Takahashi hefur dvalið tímabundið á Íslandi á hverju ári í 34 ár, Kusayanagi í 28 ár og Okada í 26 ár. K&T hefur keypt loðnu frá Íslandi í rúmlega aldarfjórðung og Okada Suisan í um fjörutíu ár. Auk loðnunnar hafa fyrirtækin keypt umtalsvert magn af makríl frá íslenskum fyrirtækjum á síðari árum.

                Takahasi segir að þetta sé í fyrsta sinn sem hann komi til Íslands á vertíðartíma og útlit sé fyrir að það verði engin loðnuvertíð. „Hver vertíð hefur sína sérstöðu. Stundum hafa vertíðir byrjað snemma og stundum seint. Stundum hefur gengið vel að finna loðnuna en stundum hefur það verið erfiðleikum bundið. Stundum hafa veiðarnar verið miklar og stundum höfum við fengið litlar vertíðir. En ég viðurkenni að útlitið hefur nánast aldrei verið jafn dökkt og nú. Það er grafalvarlegt mál ef við fáum ekki íslenska loðnu inn á japanskan neytendamarkað því þá er hættan sú að neytendur beini sjónum sínum að öðrum vörum og erfitt verði að vinna markaðinn til baka“.

salted dried capelin

Söltuð þurrkuð hrognafull íslensk loðna. Vinsæll réttur í Japan.

                Fram kom hjá viðmælendunum þremur að ef engin loðna fengist á Íslandi myndu japanskir kaupendur beina sjónum sínum að Rússlandi og Kanada. Hugsanlegt væri að fá loðnu þaðan en það væri hins vegar staðreynd að íslenska loðnan væri best og hefði unnið sér sérstakan sess hjá japönskum neytendum. Aftur á móti væri það staðreynd að neytendur væru oft fljótir að breyta neysluvenjum og það væri alvarlegt ef vara dytti algjörlega út af markaði.

                Kusayanagi segir að fulltrúar kaupenda bíði loðnufrétta hér á landi og séu nákvæmlega jafn spenntir og áhyggjufullir og forsvarsmenn íslenskra loðnufyrirtækja. „Við erum hér og bíðum og gerum okkur grein fyrir að loðnuleysið hefur ekki einungis neikvæð áhrif á fyrirtækin sem við störfum fyrir heldur á allt íslenska samfélagið og þá einkum á þau bæjarfélög þar sem loðna er unnin og þaðan sem loðnuskip eru gerð út. Þetta er vond staða fyrir alla sem nálægt loðnuveiðum og loðnuvinnslu koma. Enn er þó von og við bíðum góðra frétta.“

dried caplein

Þurrkuð íslensk loðna í japanskri verslun.

                Okada kom til Íslands 18. febrúar sl. og reiknar með að öllu óbreyttu að dvelja á landinu í vikutíma eða svo. Hann segir að fyrirtæki sitt vinni gjarnan úr um 8.000 tonnum af loðnu sem veidd er við Ísland á ári hverju en mest hafi það unnið úr 16.000 tonnum. Loðnan er þurrkuð, steikt og unnin með ýmsum hætti fyrir neytendamarkaðinn. „Íslensk loðna er geysivinsæl í Japan og vinnsla hennar er drjúgur hluti starfsemi Okada Suisan. Ef við fáum ekki loðnu frá Íslandi þá höfum við áhuga á að fá annan íslenskan fisk til vinnslu, til dæmis makríl. Okkur hefur reynst heldur erfitt að fá fólk til starfa í fiskvinnslu í Japan og það er mjög slæmt ef við lendum í hráefnaskorti því þá fer fólkið okkar í önnur störf. Það er mikil eftirspurn eftir vinnuafli í Japan um þessar mundir ekki síst vegna Olympíuleikanna sem haldnir verða í Tokyo sumarið 2020. Uppbygging vegna leikanna er afar umfangsmikil. Nú er útlit fyrir loðnuveiðar hér ekki bjart en við bíðum og vonum. Menn verða alltaf að halda í vonina. Ef staðreyndin er sú að loðnustofninn sé í lægð þá verður að bregðast skynsamlega við því. Við megum ekki bara hugsa um vertíðina núna, við verðum að hugsa til langrar framtíðar og mestu máli skiptir þá að stofninn nái sér á strik á ný. Við verðum einhvernveginn að glíma við loðnuleysi í eitt ár þó það hafi í för með sér erfiða stöðu.“

Bergur-Huginn selur Bergey VE til Grundarfjarðar

Bergey VE-544. Ljósm. Guðmundur AlfreðssonBergey VE-544. Ljósm. Guðmundur AlfreðssonÍ gær var undirritaður samningur um að útgerðarfélagið Bergur-Huginn í Vestmannaeyjum, dótturfélag Síldarvinnslunnar, selji Guðmundi Runólfssyni hf. í Grundarfirði togskipið Bergey VE 544. Gert er ráð fyrir að skipið verði afhent nýjum eiganda í síðasta lagi í septembermánuði næstkomandi.
 
Bergey VE er 486 brúttótonn að stærð og smíðuð í Gdynia í Póllandi árið 2007. Útgerð Bergeyjar hefur ávallt gengið vel rétt eins og útgerð systurskipsins Vestmannaeyjar VE. Í lok síðasta mánaðar var greint frá því að aflaverðmæti Bergeyjar, frá því að skipið hóf veiðar í ágústmánuði 2007, hefði rofið tíu milljarða múrinn og á þeim tíma var heildaraflinn orðinn rúmlega 39.000 tonn.
 
Áður hefur komið fram að Bergur-Huginn á tvö skip í smíðum í Noregi og er þeim ætlað að leysa núverandi Bergey og Vestmannaey af hólmi. Gert er ráð fyrir að útgerðarfélagið fái nýju skipin afhent á komandi sumari. Nýju skipin eru 28,95 m að lengd og 12 m að breidd og verða þau að öllu leyti afar vel búin og lögð áhersla á góða vinnuaðstöðu, góða orkunýtingu og sem fullkomnasta nýtingu á afla.
 
Magnús Kristinsson, fyrrverandi framkvæmdastjóri og núverandi stjórnarmaður í útgerðarfélaginu Bergur-Huginn, segir að það sé eftirsjá að Bergey. „Ég kem til með að sakna skipsins mikið. Að mínu mati eru Bergey og Vestmannaey best heppnuðu skip sem veitt hafa við Ísland. Við sjáum það svart á hvítu á aflanum sem þau hafa borið að landi og aflaverðmætunum. Það gekk einstaklega vel að hanna og smíða þessi skip og þar höfðu starfsmenn útgerðarfélagsins mikil áhrif. Útgerð skipanna hefur gengið einstaklega vel enda hafa þau ávallt verið vel mönnuð. Ég er líka spenntur fyrir nýju skipunum sem félagið á í smíðum og vona að þau verði jafn miklar happafleytur og þau gömlu. Það eru spennandi tímar framundan,“ segir Magnús.
 
Guðmundur Smári Guðmundsson, framkvæmdastjóri Guðmundar Runólfssonar hf., segir að ástæður fyrir skipakaupunum séu einkum tvær. Í fyrsta lagi sé fyrirtækið að taka í notkun nýja og afkastamikla fiskvinnslustöð og því sé brýnt að auka veiðigetu skipa þess. Og í öðru lagi mun nýja skipið leysa af hólmi eldra og minna skip sem nú er í eigu fyrirtækisins. „Við trúum því að við séum að fá öflugt og gott skip sem hentar okkar starfsemi vel. Við eigum fyrir sambærilegt skip og það verður hagkvæmt að gera þau út saman. Hér ríkir mikil ánægja með þessi skipakaup,“ segir Guðmundur Smári.

Lakari fiskgengd en síðustu ár

Vestmannaey VE. Ljósm. Guðmundur AlfreðssonVestmannaey VE. Ljósm. Guðmundur AlfreðssonHeimasíðan hafði samband við Birgi Þór Sverrisson skipstjóra á Vestmannaey VE og spurði hvort vertíð væri hafin af krafti. „Nei, það er varla hægt að segja það. Hér hefur fengist þokkalegur afli en það er miklu minna af fiski en hefur verið um þetta leyti árs síðustu þrjú árin. Þá er fiskurinn dreifður og styggur. Það er ætisleysi á slóðinni og til dæmis lítið um spærling. Ætisleysið gerir það að verkum að það fiskast vel á línuna. Fiskurinn ræðst á línukrókana. Togveiðiskipin gera það hins vegar ekki eins gott og síðustu ár en segja má að við séum kröfuharðir því við erum orðnir svo góðu vanir. Ég hef trú á því að mikið af vertíðarfiskinum eigi eftir að ganga hér á miðin og aflinn á eftir að aukast. Hafa verður í huga að vetrarvertíð hefur oft ekki hafist fyrr en í byrjun mars. Við höfum að undanförnu mest verið að fiska í Háfadýpinu, á Pétursey og erum nú út af Vík í Mýrdal. Veður hefur verið að stríða okkur töluvert og staðreyndin er sú að við höfum mest verið að skjótast út á milli lægða. Það ríkir bölvuð vetrartíð um þessar mundir,“ segir Birgir á Vestmannaey.

Kolmunni til Neskaupstaðar og Seyðisfjarðar

Börkur NK að toga á kolmunnamiðunum vestur af Írlandi. Ljósm. Helgi Freyr ÓlasonBörkur NK að toga á kolmunnamiðunum vestur af Írlandi.
Ljósm. Helgi Freyr Ólason
Norska skipið Manon kom til Neskaupstaðar sl. föstudag með 1.900 tonn af kolmunna. Í kjölfar hans kom síðan Börkur NK á sunnudagsmorgun með tæplega 2.300 tonn. Bjarni Ólafsson AK landaði tæplega 1.800 tonnum á Seyðisfirði aðfaranótt sunnudagsins. Þetta var fyrsti kolmunninn sem berst til Seyðisfjarðar á árinu en í Neskaupstað hefur verið tekið á móti um 5.800 tonnum.
 
Hjörvar Hjálmarsson skipstjóri á Berki segir að vel hafi gengið að fylla skipið. „Við fengum aflann í sex holum þannig að það gekk vel að veiða. Veiðisvæðið var um 300 mílur suður af Rockall en það er sunnan við mitt Írland. Við þurftum að sigla 790 mílur heim til að landa og það er andskoti langt. Á þessu svæði eru oft leiðinleg veður á þessum árstíma og þarna er búin að vera bræla síðan í gær. Auðvitað ættum við að vera á loðnu núna í staðinn fyrir að vera að veiða kolmunnann þarna. Við erum nú á leiðinni á kolmunnamiðin og á Papagrunninnu voru loðnutorfur út um allt, á 17 mílna svæði. Og það hafa borist fréttir af loðnu út á Verkamannabanka sem er suður við færeysku línuna. Ég hef aldrei heyrt um loðnu svo sunnarlega. Það hefur gengið illa að mæla nægilega mikla loðnu svo unnt sé að gefa út kvóta en ég hef trú á því að það muni takast á endanum. Það þýðir ekkert annað en að vera bjartsýnn og hér um borð eru menn það,“ segir Hjörvar.

Elsti Börkur heitir nú Sørdyrøy

Börkur NK kom nýr til Neskaupstaðar 7. nóvember 1966. Ljósm. Guðmundur SveinssonBörkur NK kom nýr til Neskaupstaðar 7. nóvember 1966.
Ljósm. Guðmundur Sveinsson
Að undanförnu hefur norski brunnbáturinn Sørdyrøy verið að flytja sláturlax til Djúpavogs fyrir fiskeldisfyrirtækin Fiskeldi Austfjarða hf. og Laxa hf. en laxinum er slátrað hjá Búlandstindi. Báturinn er í eigu norsks fyrirtækis og er leigður til að sinna flutningunum. Hófust þeir í byrjun janúar og munu standa til febrúarloka en þá mun hann hverfa til annarra verkefna.
 
Þessi bátur var smíðaður í Florø í Noregi árið 1966 og hét upphaflega Börkur. Hann var fyrsti báturinn í eigu Síldarvinnslunnar sem bar það nafn. Báturinn hefur breyst mikið frá fyrstu útgáfu: Hann var lengdur 1975 og jafnframt byggt yfir dekk hans. Árið 1989 var sett á hann ný brú og bakki ásamt fleiri endurbótum. Árið 1996 var hann lengdur á ný og gerður nýr skutur og loks árið 2003 var honum breytt í brunnbát.
 
Hér verður saga bátsins rakin í afar stuttu máli:
 
  • Börkur kom nýr til Neskaupstaðar 7. nóvember 1966. 
  • Hinn 12. september 1972 fær hann nafnið Börkur II enda Síldarvinnslan búin að festa kaup á stærra skipi sem fékk nafnið Börkur.
  • Hinn 21. desember 1972 er báturinn seldur til Akraness og fær þá nafnið Bjarni Ólafsson. Hinn 30. desember 1977 tekur sænskt skipasmíðafyrirtæki bátinn upp í nýjan bát sem það er að smíða fyrir útgerðarfélagið á Akranesi.
  • Hinn 11. janúar 1978 er báturinn seldur til Hafnarfjarðar og fær þá nafnið Arnarnes.
  • Hinn 16. janúar 1981 er báturinn seldur til Djúpavogs og fær þá nafnið Krossanes.
  • Síðar sama ár er báturinn seldur til Ólafsfjarðar og fær þá nafnið Guðmundur Ólafur. Síðar er hann nefndur Guðmundur Ólafur II.
  • Árið 2003 er bátnum breytt í brunnbát og er þá í eigu hlutafélagsins Seley ehf. Þá er báturinn nefndur Snæfugl og er með heimahöfn í Neskaupstað. Mun Snæfugl hafa verið fyrsti sérhæfði brunnbáturinn í eigu Íslendinga.
  • Árið 2008 er Snæfugl seldur til Noregs og ber nú nafnið Sørdyrøy.

 

Norski brunnbáturinn Sørdyrøy að landa laxi á Djúpavogi fyrr í mánuðinum. Ljósm. Andrés SkúlasonNorski brunnbáturinn Sørdyrøy að landa laxi á Djúpavogi
fyrr í mánuðinum. Ljósm. Andrés Skúlason

Jafnlaunavottun formlega staðfest

Jafnlaunavottun formlega staðfestNú hefur borist staðfesting frá skoðunarstofunni BSI á Íslandi þess efnis að jafnlaunakerfi Síldarvinnslunnar hafi staðist úttekt og uppfylli allar kröfur jafnlaunastaðalsins ÍST:85 2012. Úttekt á launakerfi fyrirtækisins fór fram í desembermánuði sl. Fram hefur komið að Síldarvinnslan er fyrsta sjávarútvegsfyrirtækið á landinu til að hljóta jafnlaunavottun.
 
Hákon Ernuson starfsmannastjóri Síldarvinnslunnar segir ánægjulegt að formleg staðfesting á jafnlaunakerfi fyrirtækisins sé komin í hús og þar með liggi fyrir að fyrirtækið greiði konum og körlum sambærileg laun fyrir sambærileg störf. „Auðvitað áttum við ekki von á að úttektin sýndi kynbundinn launamun en glöggt er gests augað og því jákvætt að fá staðfest að við séum með þessi mál í góðu lagi. Nú tekur við stöðug vinna við að tryggja að fyrirtækið viðhaldi jafnlaunakerfinu og bæti það þannig að launastjórnunin verði í fullkomnu samræmi við jafnlaunastaðalinn. Í þessu sambandi ber að nefna að það er ekki aðeins framkvæmd jafnlaunaúttekt á fyrirtækinu í eitt skipti heldur verða framkvæmdar reglubundnar úttektir og þannig tryggt að árangurinn sem náðst hefur haldist,“ segir Hákon.
 
 
 
 
 
Jafnlaunavottun formlega staðfest
 
 
 
 
 
 
 
 
 
 
 
 
 
 
 
 
 
 
 

Landar kolmunna og fann loðnu

Åkerøy að landa í Neskaupstað. Ljósm. Smári GeirssonÅkerøy að landa í Neskaupstað. Ljósm. Smári GeirssonNorska uppsjávarskipið Åkerøy kom til Neskaupstaðar í gærkvöldi með 1.600 tonn af kolmunna. Um er að ræða fyrsta norska skipið sem kemur með kolmunnafarm til Íslands á nýbyrjuðu ári. Þegar skipið nálgaðist landið keyrði það yfir allmargar loðnutorfur, bæði smáar og stórar. Heimasíðan ræddi við Geir Ove Åker skipstjóra á Åkerøy og spurði fyrst hvar kolmunnaaflinn hefði fengist. „Við fengum kolmunnann vestur af Írlandi. Það voru um 730 mílur frá miðunum hingað til Neskaupstaðar og það tók okkur fjóra sólarhringa að sigla hingað, en við vorum með storm á móti okkur í tvo sólarhringa á leiðinni. Þegar við nálguðumst Ísland keyrðum við yfir loðnutorfur, margar smáar og nokkrar stórar. Þetta var á 64 gráður 07.9 N og 11 gráður 58.9 vestur. Við vorum alls ekki að leita að loðnu og höfðum ekki kveikt á asdikkinu. Þetta var bara það sem við keyrðum yfir. Við gerum ráð fyrir að liggja í höfn í Neskaupstað eftir löndun og bíða í þeirri von að gefinn verði út loðnukvóti. Það er kominn annar norskur bátur til landsins og bíður. Það er Roaldsen sem liggur nú á Seyðisfirði. Síðan eru auðvitað margir bátar sem bíða í startholunum í Noregi og gera ráð fyrir að veiða loðnu við Ísland. Ef ekkert gerist varðandi loðnuna munum við halda til kolmunnaveiða á ný en við eigum eftir fimm túra í kolmunnanum,“ segir Geir Ove Åker.

Geir Ove Åker skipstjóri. Ljósm. Smári GeirssonGeir Ove Åker skipstjóri. Ljósm. Smári Geirsson
        Loðnutorfur sem Åkerøy sigldi yfir í gær.Loðnutorfur sem Åkerøy sigldi yfir í gær.

 

 

Skipin halda til kolmunnaveiða

: Beitir NK er á leiðinni til kolmunnaveiða vestur af Írlandi. Ljósm. Helgi Freyr ÓlasonBeitir NK er á leiðinni til kolmunnaveiða vestur af Írlandi.
Ljósm. Helgi Freyr Ólason
Uppsjávarskipin Beitir NK, Börkur NK og Bjarni Ólafsson AK héldu öll til kolmunnaveiða frá Neskaupstað sl. laugardag. Íslensk skip eru þegar komin á miðin og hafa verið að fá nokkurn afla síðustu daga. Heimasíðan hafði samband við Tómas Kárason, skipstjóra á Beiti, áður en skipið lét úr höfn. Tómas sagði að fátt annað væri að gera en halda til kolmunnaveiða fyrst ekki tækist að ná utan um loðnuna við landið með mælingum. „Við væntum þess að kolmunninn fari að gefa sig og veður haldist sæmilegt. Íslensku skipin eru nú að veiðum vestur af syðsta odda Írlands og þangað tekur eina þrjá sólarhringa að sigla en þetta eru um 900 mílur. Það er orðin hefð að tala um að fara á Rockall svæðið en staðreyndin er sú að það er miklu norðar því Rockall er vestur af Skotlandi. Norðmenn eru nú að veiða um 180 mílum norðar en íslensku skipin en þeir eru þar í Evrópusambandssjó. Þegar líður á vertíðina færist veiðin norður eftir og vonandi verður búið að semja við Færeyinga þegar kolmunninn gengur inn í færeyska lögsögu í maímánuði. Þeir samningar eru okkur gríðarlega mikilvægir,“ sagði Tómas.

Síldarvinnslan hættir starfsemi fiskimjölsverksmiðjunnar í Helguvík

sildarvinnslan logo

 

                Síldarvinnslan hf. hefur ákveðið að hætta starfsemi fiskimjölsverksmiðju fyrirtækisins í Helguvík.  Verksmiðjan hefur verið starfrækt frá árinu 1997. Móttöku hráefnis verður hætt að lokinni loðnuvertíð, en reyndar er fullkomin óvissa um hvort af þeirri vertíð verði.

                Áformin um lokun verksmiðjunnar voru kynnt starfsfólki í dag og voru þau einnig kynnt fulltrúum Reykjanesbæjar og öðrum hlutaðeigandi. Lokun verksmiðjunnar hefur í för með sér uppsögn sex starfsmanna en að auki hefur hún áhrif á ýmis verktaka- og þjónustufyrirtæki. Síldarvinnslan vonast til að önnur uppbygging á Suðurnesjum komi í veg fyrir að lokun verksmiðjunnar hafi þar alvarleg áhrif.

                Ástæða lokunarinnar er einfaldlega sú að rekstur verksmiðjunnar stendur ekki undir sér. Helsta ástæðan er síminnkandi hráefni til fiskimjölsverksmiðja, hækkandi kostnaður og auknar kröfur sem kalla á öflugar einingar og aukna hagræðingu. Uppistaða þess hráefnis sem borist hefur til verksmiðjunnar í Helguvík er loðna og hefur nýting verksmiðjunnar farið síminnkandi undanfarin ár. Óvissa um reksturinn hefur farið vaxandi vegna minnkandi loðnukvóta og mikillar óvissu um loðnuveiðar.

                Myndin hér fyrir neðan sýnir hvernig hráefni til fiskimjölsverksmiðja á Íslandi hefur þróast sl. 27 ár. Á henni sést hve mjög það hefur dregist saman á sl. 10 árum og vart er hægt að gera ráð fyrir að sú þróun breytist, ekki síst vegna mjög aukinnar áherslu á manneldisvinnslu.

Móttaka fiskimjölsiðnaðar

Hér fyrir ofan má sjá mynd sem sýnir þróun móttöku fiskimjölsverksmiðja á Íslandi. Smellið á myndina til að stækka

                Eins og myndin ber með sér hefur orðið mikill samdráttur í hráefni til mjöl- og lýsisframleiðslu.  Gera má ráð fyrir frekari samdrætti í fiskimjölsiðnaðinum hér á landi.   Nú eru starfræktar 11 fiskimjölsverksmiðjur á Íslandi en til dæmis í Danmörku eru þær þrjár og taka þær á móti 800 þúsund tonnum á ári til vinnslu.

                Hafist verður  handa við að ganga frá verksmiðjunni og svæðinu  í Helguvík í samráði við hlutaðeigandi yfirvöld. Unnið verður að því að koma búnaði og fasteignum í sölu og notkun.

 Fasteignir verksmiðjunnar í Helguvík geta nýst með ýmsum hætti og ekkert því til fyrirstöðu að þær gagnist samfélaginu vel.

                                                              Nánari upplýsingar veitir

                                      Gunnþór Ingvason, framkvæmdastjóri Síldarvinnslunnar hf.

 

Frystitogarinn Blængur landar eftir hringferð

Blængur NK á miðum úti. Ljósm. Bergþór GunnlaugssonBlængur NK á miðum úti.
Ljósm. Bergþór Gunnlaugsson
Frystitogarinn Blængur NK er að landa í Neskaupstað í dag að aflokinni tuttugu og tveggja daga veiðiferð. Aflinn er 540 tonn upp úr sjó að verðmæti 160 milljónir króna. Uppistaða aflans er karfi, ýsa og þorskur. Theodór Haraldsson skipstjóri segir að veiðiferðin hafi byrjað heldur rólega en síðan hafi ræst vel úr henni. „Við byrjuðum fyrir austan um miðjan janúar, en þar var þá heldur lítið að hafa. Þá fórum við vesturfyrir í Þverálinn og þaðan út á Hala. Á Halanum var heldur lítill afli og næst var farið í Víkurálinn í karfa. Karfinn var þorskblandaður þar og því var ákveðið að halda til karfaveiða í Jökultunguna. Við enduðum síðan túrinn fyrir austan í Hvalbakshallinu í góðri ýsuveiði. Á þessu sést að veiðiferðin var hringferð, við veiddum hringinn í kringum landið. Í túrnum var tíðin heldur rysjótt og það hafði auðvitað áhrif en þegar upp er staðið var þetta fínasti túr,“ segir Theodór. 
 

Ísfisktogararnir fiska vel

Landað úr Vestmannaey VE. Ljósm. Guðmundur AlfreðssonLandað úr Vestmannaey VE.
Ljósm. Guðmundur Alfreðsson
Góður afli hefur að undanförnu verið hjá ísfisktogurunum Gullver NS, Vestmannaey VE og Bergey VE. Gullver landaði síðast fullfermi á Seyðisfirði 4. febrúar og var ýsa uppistaða aflans. Vestmannaey landaði fullfermi í Neskaupstað 3. febrúar og var aflinn mestmegnis ýsa. Síðan landar Vestmannaey á morgun í Vestmannaeyjum og er aflinn um 60 tonn, mest þorskur og ýsa. Bergey landaði fullfermi á Eskifirði 31. janúar og var aflinn að mestu ýsa. Aftur landaði Bergey fullfermi í Vestmannaeyjum 4. febrúar og enn og aftur var ýsa uppistaða aflans. Þá landaði skipið í Eyjum á ný  5. febrúar, aflinn var 40 tonn, mest ufsi og þorskur.
 
Heimasíðan sló á þráðinn um borð í Vestmannaey og ræddi við Hilmar Stefánsson skipstjóra. Hilmar sagði að fiskiríið að undanförnu hefði verið mjög gott og nú væri sjálf vertíðin framundan. „Við höfum verið fyrir austan síðustu dagana, fyrst í Berufjarðarálnum og síðan í Hvalbakshallinu, og þar hefur verið mjög góð ýsuveiði. Þetta er stór og fallegur fiskur sem þarna fæst. Við erum á leið til Eyja og munum landa þar á morgun. Hann spáir norðanáttum næstu daga eða fram á sunnudag og ég reikna með að eftir löndun verði veitt við Eyjarnar. Bergey var að fá fínan afla í fyrradag suður af Eyjum og það er farið að líða að vertíð, þetta er allt að koma – það er kominn tími á vertíðina og hún er ávallt tilhlökkunarefni,“ segir Hilmar.

Smíðin á Vestmannaey og Bergey á áætlun

Frá skipasmíðastöð Vard í Aukra. Fremst á myndinni er skip sem er í smíðum fyrir Útgerðarfélag Akureyringa. Aftar til vinstri sést Vestmannaey í smíðum og Bergey til hægri.. Ljósm. Guðmundur AlfreðssonFrá skipasmíðastöð Vard í Aukra. Fremst á myndinni er
skip sem er í smíðum fyrir Útgerðarfélag Akureyringa.
Aftar til vinstri sést Vestmannaey í smíðum og
Bergey til hægri.. Ljósm. Guðmundur Alfreðsson
Í skipasmíðastöð Vard í sveitarfélaginu Aukra í Noregi er unnið að smíði á nýrri Vestmannaey og Bergey fyrir útgerðarfélagið Berg-Hugin í Vestmannaeyjum, en Bergur-Huginn er dótturfélag Síldarvinnslunnar. Þeir Gunnþór Ingvarsson framkvæmdastjóri Síldarvinnslunnar og Guðmundur Alfreðsson útgerðarstjóri Bergs-Hugins voru í Noregi í síðustu viku þar sem fundað var um smíði skipanna. Guðmundur segir að smíðin sé nokkurn veginn á áætlun og flestir verkþættir vel á veg komnir. „Í Aukra eru þrjú skip í smíðum en alls er Vard að smíða sjö systurskip fyrir íslensk fyrirtæki. Skipin sem smíðuð eru í Aukra eru Vestmannaey og Bergey ásamt skipi sem smíðað er fyrir Útgerðarfélag Akureyringa. Þessi skip eru 28,95 m að lengd og 12 m að breidd. Tvær 400 ha aðalvélar af gerðinni Yanmar verða í skipunum og í þeim verða tvær skrúfur. Þá verða skipin einnig búin nýrri kynslóð rafmagnsspila. Í skipunum verða íbúðir fyrir 13 manns og munu þau geta komið með um 80 tonn af ísuðum fiski að landi. Ákvarðanir um val á búnaði og allt fyrirkomulag í skipunum eru teknar í samráði við útgerðirnar og verður lögð áhersla á góða vinnuaðstöðu, góða meðhöndlun á afla og góða orkunýtingu. Gert er ráð fyrir að bæði skip Bergs-Hugins verði afhent eiganda í sumar. Skrokkar skipanna eru smíðaðir í einingum og eru þær gerðar í Salthammer og síðan dregnar á prömmum til Aukra þar sem þær eru settar saman. Það er mjög faglega staðið að smíði skipanna hjá Vard og full ástæða til að vera ánægður með vinnubrögðin,“ segir Guðmundur.
Í skipunum verða tvær 400 ha aðalvélar af gerðinni Yanmar og tvær skrúfur. Ljósm. Guðmundur AlfreðssonÍ skipunum verða tvær 400 ha aðalvélar af gerðinni Yanmar
og tvær skrúfur. Ljósm. Guðmundur Alfreðsson
 

Heilsueflingarnámskeið

Starfmönnum Síldarvinnslunnar verður boðið upp á heilsueflingarnámskeið á næstunni. Ljósm. Ómar BogasonStarfmönnum Síldarvinnslunnar verður boðið upp á heilsueflingarnámskeið á næstunni.
Ljósm. Ómar Bogason
Í vikunni hefjast námskeið um heilsueflingu hjá starfsmönnum Síldarvinnslunnar. Námskeiðin miða að því að hvetja starfsmenn til að huga að heilsunni og gera jákvæðar breytingar á heilsuvenjum sínum. Leiðbeinandi á námskeiðunum verður Hrönn Grímsdóttir, sem er jógakennari með MA gráðu í lýðheilsufræðum og verkefnastjóri hjá Austurbrú. 
 
Að sögn Hákonar Ernusonar, starfsmannastjóra, er tímbært og nauðsynlegt að bjóða starfsmönnum upp á slík námskeið. „Við sáum aukningu í tíðni veikinda hjá starfsmönnum á síðasta ári og það er eitthvað sem við höfum áhyggjur af. Við vitum að margir eru undir álagi, bæði hjá okkur og í samfélaginu almennt. Það hefur verið mikil umræða um þessi mál síðustu misseri, t.d. um kulnun í starfi og áhrif langvarandi álags. Við viljum að sjálfsögðu gera það sem við getum til að minnka álag á okkar fólk og erum með vinnu í gangi sem miðar að því, en við vitum líka að við getum sjálf haft mikið að segja um eigið heilsufar. Þær heilsuvenjur sem við temjum okkur í tengslum við hreyfingu, mataræði og slökun hafa mjög mikil áhrif á almennt heilsufar og líðan. Það er alltaf gott að staldra við annað slagið og skoða hvort maður getur bætt sig á þessum sviðum og námskeiðið er hugsað til að hvetja fólk til að gera einmitt það. Það er ekki alltaf gott að átta sig á því hvaða venjur er best að vinna með og það getur verið flókið fyrir okkur að átta okkur á því hvað virkar best og það er enginn skortur á fólki sem vill selja manni ýmiskonar kúra og skammtímalausnir. Rannsóknir sýna samt að þetta snýst um langtímabreytingar á lífsstíl og venjum og þess vegna fengum við fagmanneskju til að halda þessi námskeið fyrir okkur“, segir Hákon.
 
„Við viljum svo í leiðinni minna á heilsufarsskoðanir sem við bjóðum okkar fólki reglulega upp á, en öllum starfsmönnum verður boðið að mæta í skoðun á þessu ári. Við bjóðum einnig starfsfólki sem er 50 ára og eldra upp á ókeypis ristilspeglun, en slíkar skimanir eru ekki stundaðar með skipulegum hætti þótt um 70 manns látist á ári hverju úr krabbameini í ristli og endaþarmi. Þessar heilsufarsskoðanir og ristilspeglanir hafa þegar bjargað mannslífum hjá okkur og hafa því sannað gildi sitt. Við greiðum einnig 20.000 kr. styrk sem nota má til að greiða fyrir heilsueflingu, með því skilyrði að hún standi í að minnsta kosti þrjá mánuði. Svo viljum við hvetja starfsmenn til að ganga eða hjóla til vinnu og er það nýtt hjá okkur. Á tímabilinu frá 15. apríl og til 15. október geta starfsmen fengið 5000 kr. á mánuði fyrir að ganga eða hjóla til vinnu. Það er auðvitað mislangt í vinnuna fyrir starfsmenn, en fyrir suma gæti slík breyting verið alger bylting í hreyfingu“, segir Hákon.
  
Stefnt er að því að námskeiðið verði í boði fyrir alla starfsmenn, en starfsmenn fiskimjölsverksmiðjunnar í Neskaupstað ríða á vaðið á morgun, fimmtudag. Starfsmenn fiskiðjuversins eru svo næstir í röðinni og sitja námskeið á föstudag. Í kjölfarið verða haldin námskeið á öllum starfsstöðvum og eins fyrir áhafnir skipa. 

Tíu milljarða markinu náð hjá Bergey VE

Bergey VE

Bergey VE leggst að bryggju á Seyðisfirði í gærkvöldi. Ljósm: Ómar Bogason

                Bergey VE kom með fullfermi eða 70 tonn til Seyðisfjarðar í gærkvöldi. Uppistaða aflans var ýsa sem fékkst í Litladýpi og Berufjarðarálnum. Þessi veiðiferð markar tímamót í sögu skipsins því með henni fór aflaverðmæti þess yfir tíu milljarða múrinn en afli skipsins frá því það kom nýtt til landsins í ágústmánuði 2007 er 39.050 tonn. Það er útgerðarafélagið Bergur-Huginn, dótturfélag Síldarvinnslunnar, sem gerir Bergey út.

Jonni skipper

Jón Valgeirsson skipstjóri á Bergey VE ánægður með árangurinn. Ljósm: Ómar Bogason

                Það var tekið vel á móti áhöfninni á Bergey við komuna til Seyðisfjarðar í gærkvöldi og hennar beið dýrindis terta í tilefni tímamótanna. Heimasíðan sló á þráðinn til Jóns Valgeirssonar skipstjóra og spurði hverju hann vildi þakka árangurinn. „Það er einfalt, ég þakka árangurinn góðu skipi, góðri útgerð og góðri áhöfn. Það skiptir miklu máli að hafa góðan mannskap ef árangur á að nást og á Bergey hefur verið lítil hreyfing á mannskapnum. Menn virðast vera ánægðir hér um borð. Það hefur alla tíð gengið vel að fiska á skipið og eftir að Síldarvinnslan festi kaup á útgerðarfélaginu hefur meiri kvóti verið til ráðstöfunar og það munar heilmiklu. Allt frá upphafi hefur mikil áhersla verið lögð á ýsuveiði og við höfum mest fiskað við Eyjar, út af suðurströndinni og fyrir austan. Síðustu árin höfum við lítið farið vestur fyrir land. Útgerðin gerir út tvö skip,systurskipin Bergey og Vestmannaey, og sömu sögu er að segja af Vestmannaey; skipið kom nýtt til landsins í apríl 2007 og náði tíu milljarða markinu sl. sumar. Hér um borð eru menn mjög ánægðir með að hafa náð þessu tíu milljarða marki,“ segir Jón.

Ahofnin Bergey

Hluti áhafnar Bergeyjar VE með tertuna góðu. Ljósm: Ómar Bogason

                Jón Valgeirsson tók við skipstjórn á Bergey um áramótin 2013-2014 en áður hafði Sigurður Guðbjörn Sigurjónsson verið skipstjóri. „Ég tók við ákaflega góðu búi,“ segir Jón. Þá sagði Jón einnig að spennandi tímar væru framundan því útgerðin væri að láta smíða skip í Noregi sem myndu leysa núverandi Bergey og Vestmannaey af hólmi og skipin yrðu væntanlega afhent í sumar.

Undirflokkar