Þokkalegasta kolmunnaveiði

Bjarni Ólafsson AK er á landleið með fullfermi af kolmunna. Ljósm. Smári Geirsson Bjarni Ólafsson AK er á landleið með fullfermi af kolmunna. Ljósm. Smári Geirsson Bjarni Ólafsson AK, Beitir NK og Börkur NK hafa verið að kolmunnaveiðum suður af Færeyjum að undanförnu. Bjarni Ólafsson er á landleið með fullfermi og Beitir og Börkur eru langt komnir með að fylla. Heimasíðan ræddi í morgun við skipstjórana á Bjarna Ólafssyni og Beiti um veiðarnar.
 
Runólfur Runólfsson, skipstjóri á Bjarna Ólafssyni, sagði að skipið kæmi til löndunar í Neskaupstað í kvöld. „Við erum með fullfermi eða 1810 tonn en veiðin hófst 5. janúar sl. Aflinn fékkst í sjö holum en það er mjög lengi dregið eða frá 18 tímum og upp í 32. Stærsta holið okkar var 505 tonn en það minnsta 130. Veiðin fer fram í færeysku lögsögunni alveg við skosku línuna. Það hefur verið töluverður straumur en veiðin hefur engu að síður gengið þokkalega. Það er spurning hve lengi er unnt að veiða þarna því fiskurinn er að ganga suðureftir og hann spáir ekki vel. Það fer brátt að bræla og síðan verður vart veiðiveður fyrr en um miðja næstu viku,“ segir Runólfur.
 
Tómas Kárason, skipstjóri á Beiti, sagði að veiðiferðin hefði gengið vel. „Við erum komnir með tæp 3000 tonn og erum væntanlega á okkar síðasta holi. Það hefur verið hörkugangur í þessu. Við erum með nýtt troll frá Hampiðjunni og það virðist svínvirka. Aflinn hjá okkur hefur gjarnan verið töluvert meiri en hjá öðrum þrátt fyrir að við höfum dregið í styttri tíma. Við höfum verið að draga frá 6 tímum og upp í 24 og fengum til dæmis mjög gott hol eftir 12 tíma. Við erum nú á okkar ellefta holi og síðan verður lagt af stað í land síðar í dag eða í kvöld með fullfermi,“ segir Tómas.
 
Börkur var að toga í morgun og vantar um 400 tonn til að fylla. 
 
Gert er ráð fyrir að Beitir og Börkur muni landa í Neskaupstað og á Seyðisfirði.
 

Eyjarnar gera það gott

Vestmannaey VE að landa í Neskaupstað í gær. Ljósm. Smári GeirssonVestmannaey VE að landa í Neskaupstað í gær.
Ljósm. Smári Geirsson
Ísfisktogarar Bergs-Hugins, Vestmannaey VE og Bergey VE, lönduðu báðir í gær auk þess sem Bergey dró Bylgju VE að landi eftir að hún hafði fengið veiðarfæri í skrúfuna. Vestmannaey landaði í Neskaupstað en Bergey dró Bylgju til Akureyrar og landaði þar. Heimasíðan ræddi stuttlega við skipstjórana.
 
Birgir Þór Sverrisson, skipstjóri á Vestmannaey, sagði að afli skipsins hefði verið 73 tonn eða fullfermi. “Þetta var mest ufsi og ýsa og dálítið af karfa. Þetta var í reyndinni fínn túr og loksins kom dálítið ufsaskot sem lengi hefur verið beðið eftir. Aflann fengum við frá Skaftárdýpi og austur á Mýragrunn. Við fórum út eftir löndun og erum nú í Berufjarðarálnum. Hérna er sjórinn býsna kaldur og heldur lítið um fisk en hérna verðum við varir við loðnu,” segir Birgir Þór.
 
Jón Valgeirsson, skipstjóri á Bergey, sagðist ekki hafa verið með skipið í síðasta túr. “Það var Ragnar Waage Pálmason sem var með skipið. Þeir voru að fiska á Vestfjarðamiðum, fengu ýsu í Þverálsbotninum og þorsk á Strandagrunni. Þarna var ágætis veiði. Bylgja VE fékk í skrúfuna á Strandagrunni og þá tók Bergey hana í tog. Bylgja var síðan dregin í góðu veðri  í 150 mílur til Akureyrar þar sem mínir menn lönduðu rétt tæpum 60 tonnum. Ég kom um borð á Akureyri og haldið var til veiða í gærkvöldi að löndun lokinni. Nú erum við að keyra austur og ætlum að reyna fyrir okkur út af Langanesi til að byrja með,” segir Jón. 
 
Bergey VE tekur Bylgju VE í tog. Ljósm. Hákon SeljanBergey VE tekur Bylgju VE í tog. Ljósm. Hákon Seljan

Vinnsla hafin í frystihúsinu á Seyðisfirði

rystihúsið á Seyðisfirði. Gullver NS við bryggjuna. Ljósm. Ómar BogasonFrystihúsið á Seyðisfirði. Gullver NS við bryggjuna.
Ljósm. Ómar Bogason
Í morgun hófst vinnsla í frystihúsi Síldarvinnslunnar á Seyðisfirði en hún féll niður þegar stóra skriðan féll þar 18. desember sl. Heimasíðan ræddi við Ómar Bogason hjá frystihúsinu og spurði fyrst hvort fólk væri ekki ánægt með að geta hafið störf að nýju. „Jú, það má með sanni segja. Fólk er afskaplega ánægt með að lífið sé aftur að færast í fyrra horf. Við fengum heitt vatn frá fjarvarmaveitunni í húsið í gær og þá var hafist handa við að þrífa og allt var gert spikk og span. Gullver NS kom síðan í morgun með tæp 100 tonn af blönduðum afla þannig að ekki skortir hráefnið. Nú landar Gullver við fiskvinnslubryggjuna en síðast þurfti hann að landa við Strandarbakka vegna þess að ekki var fært í gegnum skriðuna. Fyrstu dagana verður starfsfólkið flutt með rútu í gegnum skriðusvæðið að frystihúsinu, en reynt er að takmarka umferðina þar sem mest vegna þess að unnið er að því að breikka veginn í gegn og hreinsa svæðið,“ segir Ómar.

Stækkun fiskimjölsverksmiðjunnar í Neskaupstað úr 1400 tonnum í 2380 tonn – aukin áhersla á framleiðslu verðmætra próteinríkra afurða

Braedsla ny 1Verksmiðjan eftir fyrirhugaða stækkun séð frá norðri. Nýbyggingar eru gular að lit með dekkri þökum.Verksmiðjan eftir fyrirhugaða stækkun séð frá norðri. Nýbyggingar eru gular að lit með dekkri þökumÁkvörðun hefur verið tekin um að stækka fiskimjölsverksmiðju Síldarvinnslunnar í Neskaupstað og auka afköst við hrognavinnslu um helming. Eftir stækkunina verður í verksmiðjunni eining eða lítil verksmiðja sem hentar sérstaklega til að vinna afskurð frá fiskiðjuveri fyrirtækisins.
 
Fyrir liggur að fiskimjölsverksmiðjur á Íslandi eru of margar og mikilvægt að auka hagræðingu í fiskimjölsiðnaðinum. Síldarvinnslan lokaði verksmiðju sinni í Helguvík á síðasta ári og var það liður í hagræðingaraðgerðum. Á Íslandi er búið við þær aðstæður að verksmiðjurnar þurfa að geta unnið mikinn afla á skömmum tíma og er því nauðsynlegt að þær séu afkastamiklar. Einnig eru aðstæður oft þannig að einungis þarf að vinna afskurð frá manneldisvinnslu og til þess þarf ekki afkastamikla verksmiðju heldur er mikilvægt að geta unnið hráefnið jafnóðum. Ákvörðun um stækkun verksmiðjunnar í Neskaupstað og uppsetningu litlu verksmiðjueiningarinnar tekur mið af þessum aðstæðum. Þegar hefur fengist starfsleyfi fyrir verksmiðju í Neskaupstað sem á að geta afkastað 2380 tonnum á sólarhring en gert er ráð fyrir að litla verksmiðjan afkasti 100-380 tonnum. Nú afkastar verksmiðjan í Neskaupstað að hámarki 1400 tonnum á sólarhring.
 
Hin auknu afköst munu gera kleift að vinna stóra farma á ásættanlegum tíma og litla verksmiðjan verður með sveigjanlegum afköstum þannig að unnt verður að vinna allt hráefni sem ferskast. Með þessu fyrirkomulagi ætti orkunýting að vera eins og best þekkist. Með tilkomu litlu verksmiðjunnar verður lögð áhersla á að auka gæði framleiðslunnar og þróa áfram aðferðir til að framleiða verðmætar próteinríkar afurðir.
 
Verksmiðjan eftir fyrirhugaða stækkun séð frá vestri. Nýbyggingar gular að lit með dekkri þökumVerksmiðjan eftir fyrirhugaða stækkun séð frá vestri. Nýbyggingar gular að lit með dekkri þökumGert er ráð fyrir að framkvæmdum við verksmiðjuna verði skipt í tvo áfanga. Í fyrri áfanganum verður reist 2000 fermetra hús með öllu tiheyrandi, þar á meðal öflugri loftræstingu og lykteyðingarbúnaði. Þá verður allur búnaður í litlu verksmiðjuna keyptur og hún sett upp. Gert er ráð fyrir að kostnaður við fyrri áfangann verði um 2,3 milljarðar króna. Í síðari áfanganum verður komið upp búnaði í verksmiðjunni sem eykur afkastagetu hennar í 2380 tonn. Unnt verður að koma búnaðinum fyrir í skrefum þannig að framkvæmdir munu ekki trufla starfsemi verksmiðjunnar. Áætlaður kostnaður við þennan síðari áfanga er um 2 milljarðar króna.
 
Einnig er ákveðið að ráðast í verulegar framkvæmdir við stækkun á hrognavinnslunni. Til dæmis þarf að stækka löndunarhús um 300 fermetra og fjárfesta í nýjum búnaði. Gert er ráð fyrir að kostnaður við þær framkvæmdir verði hátt í 500 milljónir króna.

Fyrstu togaralandanir ársins

Nú er landað úr Gullver NS við Strandarbakka á Seyðisfirði. Ljósm. Ómar BogasonNú er landað úr Gullver NS við Strandarbakka á Seyðisfirði. Ljósm. Ómar BogasonÍsfisktogarar Síldarvinnslunnar og Bergs-Hugins komu úr fyrstu veiðiferð ársins í gær og í nótt. Bergey VE kom til hafnar í Vestmannaeyjum í gær með um 60 tonn. Uppistaða aflans var ýsa. Vestmannaey VE kom síðan til löndunar sl. nótt með 55 tonn og var aflinn þar einnig að mestu ýsa. Að sögn Arnars Richardssonar rekstrarstjóra byrjar árið snemma að þessu sinni en í fyrra komust skip Bergs-Hugins ekki á sjó fyrr en 13. janúar vegna veðurs.
 
Gullver NS er að landa á Seyðisfirði í dag. Afli skipsins er 65 tonn og er uppistaðan þorskur og ýsa. Vegna hamfaranna í desember er ekki landað úr skipinu við frystihúsið heldur við Strandarbakka. Er þetta í fyrsta sinn sem fiski er landað þar en ferjan Norræna er afgreidd við Strandarbakka. Að sögn Ómars Bogasonar er gert ráð fyrir að vinnsla í frystihúsinu geti hafist í fyrri hluta næstu viku en unnið er að hreinsunarstarfi á Seyðisfirði af eins miklum krafti og unnt er.

Minni afli hjá ísfisktogurunum en svipaður hjá Blængi

Ísfisktogararnir fiskuðu minna á nýliðnu ári en á árinu 2019. Ljósm. Guðmundur AlfreðssonÍsfisktogararnir fiskuðu minna á nýliðnu ári en á árinu 2019. Ljósm. Guðmundur AlfreðssonÍsfisktogarar Síldarvinnslunnar og Bergs-Hugins öfluðu minna á nýliðnu ári en á árinu 2019. Er helsta skýringin minni sókn vegna aðstæðna sem mynduðust á mörkuðum í kjölfar heimsfaraldurs. Hinsvegar er verðmæti aflans stöðugt milli ára. Afli ísfisktogarnna á árinu 2020 og verðmæti afla þeirra var sem hér segir:
 
               Afli                    Verðmæti  
Vestmannaey VE 3.900 tonn 1.170 mkr
Bergey VE 4.450 tonn 1.330 mkr
Gullver NS 5.100 tonn 1.260 mkr
 
Aðra sögu er að segja af frystitogaranum Blængi NK. Afli hans var svipaður á árunum 2019 og 2020 en verðmæti aflans jókst töluvert á milli áranna. Á árinu 2020 fiskaði Blængur 7.050 tonn og nam verðmæti aflans 2.413 milljónum króna.

Gott ár í uppsjávarveiðum

Norðfjarðarhöfn á makrílvertíð sl. sumar. Ljósm. Smári GeirssonNorðfjarðarhöfn á makrílvertíð sl. sumar.
Ljósm. Smári Geirsson
Þrátt fyrir loðnuleysi telst árið 2020 hafa verið gott ár hvað varðar veiðar á uppsjávartegundum. Skip Síldarvinnslunnar, Beitir NK og Börkur NK, öfluðu vel af síld, makríl og kolmunna og sama á við um um Bjarna Ólafsson AK sem er í eigu dótturfélagsins Runólfs Hallfreðssonar ehf. Þá var verð á uppsjávarafurðum gott þannig að afkoman af veiðunum var ágæt. Afli skipanna og aflaverðmæti var sem hér segir:

      Heildarafli              Verðmæti      
 Beitir NK    44.894 tonn 1.929 mkr
Börkur NK 46.918 tonn

1.982 mkr

Bjarni Ólafsson AK 32.034 tonn 1.379 mkr

 

Fiskiðjuver Síldarvinnslunnar í Neskaupstað tók á móti 46.882 tonnum af makríl og síld til vinnslu á nýliðnu ári. Móttekinn makríll nam 23.098 tonnum og móttekin síld 23.784 tonnum. 

Fiskimjölsverksmiðjur Síldarvinnslunnar tóku samtals á móti 123 þúsundum tonnum af uppsjávarfiski. Verksmiðjan í Neskaupstað tók á móti 106 þúsund tonnum og verksmiðjan á Seyðisfirði tók á móti 17 þúsund tonnum af kolmunna.

Skipin á sjó eftir hátíðar

Polar Amaroq í Norðfjarðarhöfn. Skipið heldur væntanlega til loðnuleitar í kvöld. Ljósm. Hákon ErnusonPolar Amaroq í Norðfjarðarhöfn. Skipið heldur væntanlega til loðnuleitar í kvöld. Ljósm. Hákon ErnusonSkip Síldarvinnslunnar og tengdra fyrirtækja hafa nú öll haldið til veiða nema frystitogarinn Blængur NK sem er í slipp á Akureyri og Polar Amaroq sem taka mun þátt í loðnuleit. Kolmunnaskipin Beitir NK og Börkur NK létu úr höfn aðfaranótt sunnudags og Bjarni Ólafsson AK hélt fljótlega í kjölfar þeirra. Börkur og Beitir höfðu kastað í morgun á kolmunnamiðunum suðaustur af Færeyjum en færeysk skip hafa verið þar að veiðum að undanförnu. 
 
Ísfisktogararnir héldu til veiða um helgina. Bergey VE sigldi út úr Vestmannaeyjahöfn á laugardagsmorgun og Vestmannaey VE í gær. Gullver NS hélt frá Seyðisfirði á laugardag.
 
Grænlenska uppsjávarskipið Polar Amaroq heldur væntanlega til loðnuleitar í kvöld. Mun Polar Amaroq leita að loðnu ásamt hafrannsóknaskipunum Bjarna Sæmundssyni og Árna Friðrikssyni og veiðiskipunum Ásgrími Halldórssyni SF og Aðalsteini Jónssyni SU.

Áramót

Áramót

Áramótakveðja til starfsmanna og viðskiptavina

Gunnþór IngvasonGunnþór IngvasonUm áramót notum við gjarnan tækifærið til að líta yfir liðið ár og huga að tækifærum nýs árs.  Það er eflaust mörgum létt við þá tilhugsun að þetta blessaða ár sé senn á enda. Við höfum þurft að lifa við skerðingar á lifnaðarháttum sem að eiga sér vart fordæmi. Það er samt sem áður tilefni til bjartsýni og virðumst við vera farin að sjá ljósið við enda ganganna í baráttunni við þann skæða vágest sem covid 19 er.
 
Faraldurinn hefur haft áhrif á starfsemi og rekstur Síldarvinnslunnar líkt og flestra annarra fyrirtækja. Við störfum á alþjóðlegum mörkuðum og seljum afurðir okkar til fjölmargra landa. Við höfum þurft að aðlaga framleiðslu og sölu á afurðum í takt við breytingar á eftirspurn á mörkuðum.  Sumir markaðir nánast hurfu á meðan aðrir höktu, höggið er mikið á mörkuðum  fyrir fisk sem fer á veitinga- og gististaði í helstu ferðaþjónustulöndunum.
 
Starfsmenn Síldarvinnslunnar hafa mætt þessum áskorunum með þrautseigju. Þeir hafa allir  lagst á eitt og samstaðan hefur verið aðdáunarverð. Starfsmenn hafa þurft að færa miklar fórnir þegar þeir hafa sinnt ýmsum tilmælum. Skerða hefur þurft samgang starfsmanna og vina.  Sjómenn hafa tekið á sig fórnir í lengri útiverum. Starfsmenn hafa fórnað ferðalögum.  Það hafa allir lagt sitt af mörkum.
 
Fyrirhuguð árshátíðarferð til Póllands á haustmánuðum, sem við biðum öll eftir, var blásin af, við munum finna tíma síðar til að gleðjast og fagna saman um leið og tækifæri gefst til.  Við skulum gleðjast þeim mun meira þegar þar að kemur.
 
Árið byrjaði með loðnubresti annað árið í röð sem voru vonbrigði en við bindum miklar vonir við komandi vertíð, enda flest sem bendir til að framundan sé góð loðnuvertíð og við trúum því að markaðirnir bíði eftir afurðunum þannig að það er full ástæða til að vera bjartsýn.  
 
Við héldum áfram að efla og styrkja innviði félagsins með frekari fjárfestingum. Það sem  stendur hæst upp úr í þeim efnum eru kaup dótturfélags okkar Bergs- Hugins ehf á öllu hlutafé í Bergur ehf. Renna þau  kaup  enn sterkari stoðum undir starfsemi okkar  í Vestmannaeyjum. 
 
Þrátt fyrir ýmsar mótbárur þá berum við höfuðið hátt, reksturinn gekk vel þegar leið á árið.  Veiðar og vinnsla uppsjávarfiska gekk vel, markaðir þar voru góðir.  Bolfiskmegin voru meiri brekkur, við þurftum að  draga úr veiðum og vinnslu, frosnar afurðir hafa hlaðist upp en þrátt fyrir það treystum við á bjartari tíma.  
 
Á nýju ári fáum við nýjan Börk sem mun bætist í skipaflota félagsins á fyrri hluta ársins og verður hann í hópi fullkomnustu uppsjávarskipa í heiminum og mun styðja enn við markmið okkar um hagkvæmari skip, minni útblástur og betra hráefni.
 
Á nýju ári eru alþingiskosningar og í aðdraganda þeirra bera málefni sjávarútvegs iðulega á góma. Þjóðhagslegt mikilvægi sjávarútvegs hefur sannað sig á árinu og enn og aftur kemur í ljós að öflugur sjávarútvegur er þjóðhagslega mikilvægur.  Við eigum að sameinast um að tryggja að þessi þjóðarauðlind okkar geti verið undirstaða lífskjara í landinu.  Þrátt fyrir að oft og iðulega sé tekist á um málefni greinarinnar, hef ég fulla trú á því að á komandi ári munum við fá uppbyggilega og málefnalega umræðu um málefni sjávarútvegsins.    Pólitíkusum allra flokka er velkomið að heimsækja Síldarvinnsluna og kynna sér starfsemi hennar á komandi ári.
 
Heimabærinn minn lenti í náttúruhamförum rétt fyrir jól, þar sem fólk þurfti að yfirgefa heimili. Guðs blessun var að engin slys urðu á fólki. Ég óska þess að á nýju ári komi fram trúverðugar áætlanir um varnir fyrir Seyðfirðinga þannig að þeir geti fundið ró í sínum fallega heimabæ, sem ég tel að sé fegursti bær landsins.
 
Ég tel að leiðin fram á við fyrir okkur öll snúist um samstöðu, samheldni og virðingu fyrir hvert öðru.  Því miður þá virðist hið neikvæða, niðurrif og svartýni eiga meira erindi í opinbera umræðu en látum slíkt ekki leiða okkur áfram á nýju ári.
 
Kæru samstarfsmenn, ég óska ykkur og fjölskyldum ykkar gleðilegs nýs árs og ég vona að við getum fyrr en síðar átt fleiri samverustundir. 
 
Ég hef oft sagt að árangur Síldarvinnslunnar megi þakka framúrskarandi starfsfólki og öflugum samfélögum sem fyrirtækið starfar í. Það hefur sannnað sig enn og aftur á árinu 2020. Nú tökum við áramótin með okkar nánustu og njótum.
 
Mætum árinu 2021 samstillt og ákveðin í aðlaga okkur að þeim áskorunum sem okkur bíða, snúum bökum saman, gerum okkar besta og bara aðeins betur ef það er það sem þarf.
 
Með þökkum fyrir árið sem er að líða og óskum um gleðilegt ár
 
Sjáumst kát á nýju ári kæru vinir. 
 
Kveðja,
Gunnþór Ingvason
 

Fyrsti túr í skipstjórastólnum

Hjálmar Ólafur BjarnasonHjálmar Ólafur BjarnasonÞegar stóra aurskriðan féll á Seyðisfirði föstudaginn 18. desember sl. voru margir í áhöfn Seyðisfjarðatogarans Gullvers áhyggjufullir en skipið var þá að veiðum á sínum hefðbundnu miðum austur af landinu. Að því kom að skipið var kallað inn og kom það að landi aðfaranótt laugardagsins. Allir Seyðfirðingar í áhöfninni sem þess óskuðu fengu frí en skipið þess í stað mannað Norðfirðingum og það tók nánast örskotsstund að manna skipið. Ætlunin var að fara í stuttan karfatúr. Skipstjóri í þessari veiðiferð var Hjálmar Ólafur Bjarnason og var þetta í fyrsta sinn sem hann settist í skipstjórastól en hann hefur verið stýrimaður á Gullver frá árinu 2017. Hjálmar Ólafur hóf sjómennsku á Barða NK einungis 16 ára að aldri árið 1999 og settist í Stýrimannaskólann árið 2010. Hann lauk síðan stýrimannaprófi árið 2014. Heimasíðan ræddi við Hjálmar Ólaf um þessa fyrstu veiðiferð hans í skipstjórastólnum. „Þetta bar brátt að en hamfarirnar á Seyðisfirði gerðu það að verkum að ég, Norðfirðingurinn, færi með skipið. Markmiðið með veiðiferðinni var að veiða karfa og okkur tókst með herkjum að ná þeim afla sem ætlast var til. Veiðiferðin stóð einungis í um tvo sólarhringa og við reyndum fyrir okkur á hefðbundnum slóðum: Lónsdýpinu, Hornafjarðardýpinu og einnig út á Þórsbanka. Staðreyndin er sú að það voru ekki miklar væntingar um góðan afla. Auðvitað voru það tímamót að fara í sinn fyrsta túr sem skipstjóri og þetta gekk allt saman stórslysalaust,“ segir Hjálmar Ólafur.

Einungis eitt skip á sjó

Vestmannaey VE. Ljósm. Guðmundur AlfreðssonVestmannaey VE. Ljósm. Guðmundur AlfreðssonEinungis eitt skip úr flota Síldarvinnslunnar og tengdra fyrirtækja er á sjó nú á milli jóla og nýárs. Það er Vestmannaey VE sem hélt til veiða í gærkvöldi. Heimasíðan ræddi stuttlega við Birgi Þór Sverrisson skipstjóra í morgun og spurði fyrst út í veðrið. „Það er búinn að vera bölvaður norðan garri. Við erum í Háfadýpinu að veiðum núna og gerum ráð fyrir að fara í land á miðvikudagskvöld. Þetta verða semsagt þrír sólarhringar að veiðum. Við munum svo fagna nýju ári og halda væntanlega á ný til veiða 2. janúar,“ segir Birgir Þór.

 

 

 

Jólakveðja

Jólakveðja

Skötuveislan sem engan svíkur

Skötumeistararnir, Ómar Sverrisson og Hafþór Eiríksson, klárir í veisluna og skatan tilbúin að fara í pottanaSkötumeistararnir, Ómar Sverrisson og Hafþór Eiríksson, klárir í veisluna og skatan tilbúin að fara í pottanaÍ tuttugu ár hefur verið boðið til skötuveislu á Þorláksmessu í fiskimjölsverksmiðju Síldarvinnslunnar í Neskaupstað. Það eru starfsmenn verksmiðjunnar sem sjá um veisluna og er þá vísindalegri nákvæmni beitt. Líklega er þetta eina skötuveisla landsins þar sem mæling fer fram á styrk skötunnar. Ammoníak er mælt og síðan reiknað út svonefnt TVN-gildi. Þegar TVN-gildi hráefnis í verksmiðjunni fer yfir 100 heyrist í öllum viðvörunarbjöllum en öðru máli gegnir um skötuna. Í ár mældist TVN-gildi skötunnar 627 en það er mjög hóflegur styrkur því hæst hefur gildið hjá þeim í fiskimjölsverksmiðjunni farið í 974. Skatan í ár verður því í mildara lagi, ljúf og góð.
 
Þeir starfsmenn verksmiðjunnar sem sjá um skötuveisluna í ár eru Hafþór Eiríksson verksmiðjustjóri og Ómar Sverrisson. Þeir eru nýliðar á þessu sviði en ganga bjartsýnir til verks. Miðað við veislurnar í verksmiðjunni á undanförnum árum er eitt alveg víst og það er að skötuveislan þar svíkur engan.
 
Tekið skal fram að hörðustu sóttvarnarreglum verður fylgt í skötuveislunni þetta árið þannig að covid mun koma í veg fyrir þá stemmingu sem áður hefur ríkt í veislunum.

Seyðisfjörður

Seyðisfjörður á fögrum sumardegi, en myndin sýnir einmitt helsta hamfarasvæðið. Unga stúlkan á myndinni bjó í Framhúsinu sem gjöreyðilagðist í stóra aurflóðinu sem féll sl. föstudag. Ljósm. Ómar BogasonSeyðisfjörður á fögrum sumardegi, en myndin sýnir einmitt helsta hamfarasvæðið. Unga stúlkan á myndinni bjó í Framhúsinu sem gjöreyðilagðist í stóra aurflóðinu sem féll sl. föstudag. Ljósm. Ómar BogasonTjónið á Seyðisfirði er mikið. Fólk hefur misst eigur sínar, íbúar hafa orðið fyrir áfalli þar sem náttúran minnti á sig. Skarð hefur verið höggvið í bæinn, sem er á meðal merkustu þéttbýliskjarna á landinu og byggður að drjúgum hluta upp af erlendum athafnamönnum á seinni hluta 19. aldar. Mikil saga um djörfung og hug fyrri tíma hefur farið forgörðum. Sögufræg hús hafa horfið og sum þeirra hafa staðið í yfir 130 ár. Húsin á Seyðisfirði eru mikilvægar minjar um byggingarstíl fyrri tíma.
 
Það er guðs mildi að enginn skuli hafa slasast eða misst líf í þessum hamförum, en eftir stendur óttinn við náttúruöflin og sár á sálinni sem þarf að græða. Það er brýnt að allir sem eiga um sárt að binda hugi að því og fá þá aðstoð sem þeir þurfa. Leggja þarf árherslu á rannsóknir í fjallinu og koma þurfa fram trúverðugar lausnir til að tryggja öryggi íbúa. 
 
Hugur okkar allra er hjá íbúum Seyðisfjarðar og aðdáunarvert hefur verið að fylgjast með öllu því fólki sem staðið hefur í þessum átökum. Sjálfboðaliðar björgunarsveitanna eru enn og aftur að standa vaktina þegar þörfin er mest, allt það fólk sem unnið hefur dag og nótt við aðgerðastjórn á vettvangi, fólk sem hefur þurft að taka erfiðar ákvarðanir. Samheldni samfélagsins í kringum Seyðisfjörð sýnir enn og aftur hvað hjarta okkar er stórt þegar kemur að atburðum sem þessum.
 
Síldarvinnslan er með um 50 starfsmenn í fiskimjölsverksmiðju og frystihúsinu. Það er guðs blessun að ákveðið var að vera ekki með starfsemi daginn örlagaríka og því engir af okkar starfsmönnum í hættu við störf sín. Mannvirki fyrirtækisins voru utan hamfarasvæðanna, rafmagn og hiti fóru af frystihúsinu en með góðum samskiptum við aðgerðastjórn fékkst leyfi til að fara með starfsmenn inn á svæðið á sunnudaginn og koma frystivélum og búnaði í gang þannig að enginn skaði varð. Ferskur fiskur var í kæli hússins sem þurfti að koma í vinnslu annað. Á mánudag fengum við leyfi til að fara með starfsmenn inn á svæðið og ná í ferska fiskinn og nutum við aðstoðar  varðskipsins Týs við það verkefni.
 
Staðan er þannig núna að svæðið er lokað og óvíst er hvenær við getum farið með fólk inn á það.  Framundan er gríðarlegt hreinsunarstarf og óvíst er hvað það tekur langan tíma.  Við vonumst til að geta farið að vinna fisk í frystihúsinu hinn 6. janúar nk.,  en við munum halda góðu sambandi við aðgerðastjórn á Seyðisfirði og vonumst til að eiga gott samstarf við hana áfram.  Alla tímasetningar verða endurmetnar með tilliti til framgangs hreinsunarstarfsins.
 
Hugur minn og okkar allra er hjá Seyðfirðingum núna. Þetta er erfitt, en samheldni og samtakamáttur mun koma þeim í gegnum þetta. Guð gefi Seyðfirðingum öllum gleðileg jól. Það mun aftur koma „vor við Seyðisfjörð.“ 
 
Kveðja,
Gunnþór Ingvason

Rannsóknaverkefni sem skila árangri

Fiskimjölsverksmiðja Síldarvinnslunnar í Neskaupstað. Síldarvinnslan tekur þátt í þremur rannsóknaverkefnum sem snúast um framþróun í framleiðslu fiskimjöls. Ljósm. Smári GeirssonFiskimjölsverksmiðja Síldarvinnslunnar í Neskaupstað. Síldarvinnslan tekur þátt í þremur rannsóknaverkefnum sem snúast um framþróun í framleiðslu fiskimjöls.
Ljósm. Smári Geirsson
Undanfarin ár hefur Síldarvinnslan í samvinnu við Rannsóknastofnun fiskiðnaðarins og síðar Matís lagt stund á rannsóknir á sviði meðferðar og nýtingu fiskfangs. Mörg þessara rannsóknaverkefna hafa verið unnin í samvinnu við önnur sjávarútvegsfyrirtæki, tæknifyrirtæki í sjávarútvegi og háskóla. Reyndar eru mörg verkefnanna doktorsverkefni, flest við innlenda háskóla en einnig við Sjávarútvegsskóla Sameinuðu þjóðanna.
 
Niðurstöður þessara verkefna hafa verið birtar í formi ritrýndra vísindagreina eða doktorsritgerða og nýtast þær öllum sem vilja, jafnt opinberum stofnunum sem fyrirtækjum. Síldarvinnslan hefur sótt um styrki til nokkurra verkefna sem unnið hefur verið að. Þeir styrkir sem veittir hafa verið hafa að mestu verið nýttir sem mótframlag á móti doktorsstyrkjum eða öðrum slíkum styrkjum ásamt því að þeir hafa verið nýttir til að greiða fyrir mælingar og aðra þjónustu sem Matís veitir, en Matís er reyndar eina fyrirtækið á landinu sem unnt er að leita til í því sambandi.
 
Síldarvinnslan er þátttakandi í þremur verkefnum sem fengu styrki úr Matvælasjóði nú í haust. Öll verkefnin snúast um breytingar og framþróun í framleiðslu fiskimjöls. Tvö þeirra eru á sviði þráavarnar í mjöli. Annað þeirra tekur til skoðunar hvort unnt sé að nýta afurðir þörungavinnslu sem þráavarnarefnis en hitt er unnið í samvinnu við Skinney-Þinganes og Ísfélagið og snýst um hitamyndun og þránun í mjöli. Þriðja verkefnið er samstarfsverkefni Síldarvinnslunnar og Matís um breytingar á vinnsluferli í fiskimjölsverksmiðjum með áherslu á fiskprótein í sem hreinustu formi.
 
Það er gríðarlega mikilvægt að sjávarútvegsfyrirtæki og menntasamfélagið hafi samvinnu um verkefni á borð við þessi. Fyrri verkefni hafa þegar skilað miklum árangri og hafa verið fiskiðnaðinum til framdráttar og styrkt stöðu hans.
Hér á heimasíðunni mun verða gerð nánari grein fyrir verkefnunum þremur þegar niðurstöður liggja fyrir.

Mikill brælutúr

Blængur NK kemur til hafnar. Ljósm. Smári GeirssonBlængur NK kemur til hafnar. Ljósm. Smári GeirssonFrystitogarinn Blængur NK kom til Neskaupstaðar í morgun að aflokinni 15 daga veiðiferð. Afli skipsins var 350 tonn upp úr sjó að verðmæti 104 milljónir króna. Uppistaða aflans var karfi, þorskur og ufsi. Heimasíðan ræddi við Bjarna Ólaf Hjálmarsson skipstjóra og spurði fyrst hvernig veðrið hefði verið í veiðiferðinni. „Þetta var mikill brælutúr. Veðrið var vissulega misjafnlega slæmt en það fór aldrei niður fyrir 15-20 metra. Við byrjuðum á að sigla vestur fyrir land og hófum veiðar á Vestfjarðamiðum. Þar var unnt að vera í eina fimm daga en þá gerði vitlaust veður og þá var haldið austur fyrir land. Undir lokin veiddum við síðan úti fyrir suðurströndinni. Við vorum á eilífum flótta undan veðrinu. Það má auðvitað gera ráð fyrir svona veðurlagi á þessum árstíma, það er víst vetur,“ segir Bjarni Ólafur.
 
Landað verður úr Blængi í dag og í kvöld verður haldið af stað til Akureyrar þar sem framundan er mánaðar slippur. Gert er ráð fyrir að skipið haldi á ný til veiða 29. janúar.

Vinnan í nýjum Berki á áætlun

Nýi Börkur í Skagen. Um borð í skipinu starfa 160-170 manns á hverjum degi. Ljósm. Karl Jóhann BirgissonNýi Börkur í Skagen. Um borð í skipinu starfa 160-170 manns á hverjum degi. Ljósm. Karl Jóhann BirgissonÞeir Karl Jóhann Birgisson og Jóhann Pétur Gíslason vélstjóri hafa dvalið í Skagen í Danmörku í tvo og hálfan mánuð þar sem þeir hafa fylgst með framkvæmdum um borð í nýjum Berki sem er í smíðum hjá Karstensens Skibsværft. Þeir félagar komu til landsins í jólafrí 12. desember sl. og er gert ráð fyrir að Karl Jóhann og Hörður Erlendsson vélstjóri haldi til Skagen eftir áramótin þegar framkvæmdir við skipið hefjast á ný fyrir alvöru. Heimasíðan ræddi stuttlega við Karl Jóhann og spurði frétta. „Skipið liggur í Skagen og þar er unnið um borð af miklum krafti. Að undanförnu hafa um 160-170 manns starfað um borð í skipinu og til viðbótar er unnið á verkstæðum að verkefnum sem tengjast framkvæmdum um borð. Það er afar gott skipulag á framkvæmdunum. Verkfundir eru haldnir reglulega og skipinu er skipt upp í svæði og á hverju svæði er verkstjóri sem ber ábyrgð á öllu sem þar fer fram. Það gengur allt snurðulaust fyrir sig og það er í reynd aðdáunarvert hvernig að málum er staðið. Verkið er á áætlun og samkvæmt henni  á skipið að fara í prufusiglingu í lok febrúar og afhending þess að eiga sér stað í apríl. Ýmislegt getur þó raskað áætluninni og það er þá helst covid. Jóhann Pétur fylgist grannt með öllum framkvæmdum sem snerta vélar og tæki. Hann dvelur löngum stundum í vélarrúminu þar sem meðal annars þarf að ganga frá tveimur aðalvélum og tveimur ljósavélum. Á dögunum var gengið frá öllum krönum og vindum í skipinu og vóg sá búnaður hvorki meira né minna en 200 tonn. Hafa skal í huga að við framkvæmdir um borð í Berki njótum við þess að systurskipið, Vilhelm Þorsteinsson, er einnig í smíðum hjá Karstensens og framkvæmdir þar eru lengra komnar. Vilhelm fór til dæmis í prufusiglingu á dögunum sem gekk afar vel. Það auðveldar ýmislegt hjá okkur að vera skip númer tvö,“ segir Karl Jóhann.

Lokið er við að koma krönum og vindum fyrir í skipinu. Sá búnaður vóg 200 tonn. Ljósm. Karl Jóhann BirgissonLokið er við að koma krönum og vindum fyrir í skipinu. Sá búnaður vóg 200 tonn. Ljósm. Karl Jóhann Birgisson

Eyjarnar komnar í jólafrí

Eyjarnar lönduðu í gær og eru komnar í jólafrí. Ljósm. Guðmundur AlfreðssonEyjarnar lönduðu í gær og eru komnar í jólafrí.
Ljósm. Guðmundur Alfreðsson
Ísfisktogarar Bergs-Hugins, Vestmannaey VE og Bergey VE, komu báðir með fullfermi til Vestmannaeyja í gær. Aflinn var mestmegnis þorskur og ýsa sem fékkst fyrir austan land. Heimasíðan ræddi stuttlega við Egil Guðna Guðnason sem var skipstjóri á Vestmannaey í veiðiferðinni. „Við vorum að veiða á Gerpisflakinu í skítaveðri. Aflinn fékkst á fjórum dögum en megnið af honum kom þó á einum og hálfum sólarhring. Það voru yfir 20 metrar allan tímann sem við vorum þarna og svo fengum við 30 metra norðaustan á leiðinni heim til Eyja. Bergey var á alveg sama róli og við,“ segir Egill Guðni.
 
Eyjarnar eru nú komnar í jólafrí og munu ekki halda á ný til veiða fyrr en 2. janúar. Í því sambandi er rétt að rifja upp að skipin héldu ekki til veiða eftir síðasta jólafrí fyrr en 13. janúar vegna veðurofsa.

Kolmunni berst að landi

Beitir NK og Börkur NK í stórrigningunni í Norðfjarðarhöfn í morgun. Ljósm. Smári GeirssonBeitir NK og Börkur NK í stórrigningunni í Norðfjarðarhöfn í morgun. Ljósm. Smári GeirssonBörkur NK kom til heimahafnar í Neskaupstað í gærkvöldi með 2250 tonn af kolmunna eða fullfermi. Beitir NK kom síðan í morgun með 3050 tonn. Gert er ráð fyrir að landað verði úr skipunum jafnóðum og hráefnið er unnið því betra er að geyma það kælt um borð í þeim en í hráefnistönkum fiskimjölsverksmiðjunnar.
 
Hálfdan Hálfdanarson skipstjóri á Berki segir að veiðarnar hafi gengið nokkuð vel. „Við vorum að veiða á gráa svæðinu suður af Færeyjum alveg við skosku línuna. Þar var flotinn að veiðum. Aflann fengum við í sjö holum en við vorum sex daga að veiðum. Fiskurinn sem þarna fæst er stór og góður,“ segir Hálfdan.
 
Tómas Kárason skipstjóri á Beiti tekur undir með Hálfdani og segir að um ágætan fisk sé að ræða. „Við fengum aflann í 11 holum, en reyndar var lítið í fyrsta holinu. Holin voru gjarnan að gefa 300-350 tonn og einu sinni fengum við 450 tonna hol. Það var dregið í 15-24 tíma,“ segir Tómas.
 
Skipin munu ekki halda á ný til veiða fyrr en eftir hátíðar, en fram kom hjá skipstjórunum að áhafnirnar bíði spenntar eftir fréttum úr loðnuleiðangrinum sem nýlega er lokið.

Undirflokkar