Hugað að íslenskri sumargotssíld

Beitir NK. Ljósm. Hákon ErnusonBeitir NK. Ljósm. Hákon ErnusonBeitir NK hélt til síldveiða sl. sunnudagskvöld og mun hann huga að íslensku sumargotssíldinni. Síldarvinnsluskipin hafa heimild til að veiða um 4.000 tonn af þeirri síld. Beitir sigldi vestur fyrir land og ræddi heimasíðan við Tómas Kárason skipstjóra í morgun, en þá var skipið statt út af Reykjanesi. Tómas sagði að enn væri heldur lítið að frétta. „Það er rólegt yfir þessu og menn fara sér að engu óðslega. Við fréttum af því í gærkvöldi að ágætis lóð væru í Jökuldýpinu og Margrét EA kastaði þá. Aflinn reyndist vera um 140 tonn og nú þarf að skoða síldina meðal annars með tilliti til sýkingarinnar sem hefur verið í þessum síldarstofni undanfarin ár. Við erum á leiðinni í Jökuldýpið og það er blíða eins og er en það spáir víst kalda þegar líður á daginn,“ segir Tómas.

Eilífur flótti undan veðri

Blængur NK. Ljósm. Hákon ErnusonBlængur NK. Ljósm. Hákon ErnusonFrystitogarinn Blængur NK kom til Neskaupstaðar í gærkvöldi að lokinni mánaðarlangri veiðiferð. Afli skipsins er tæplega 700 tonn að verðmæti 215 milljónir króna. Uppistaða aflans er ufsi og karfi. Theodór Haraldsson skipstjóri segir að túrinn hafi fyrst og fremst einkennst af eilífum flótta undan veðri. „Við byrjuðum túrinn fyrir austan land vegna slæms veðurs fyrir vestan. Reynt var að finna ufsa en það gekk ekki alltof vel. Þegar veður lægði vestra héldum við þangað og þar var reynt við ufsa, karfa og ýsu. Tíðin var í reyndinni djöfullleg stóran hluta veiðiferðarinnar. Einu sinni var farið undir Grænuhlíð og legið í vari og einu sinni hröktumst við úr Reykjafjarðarálnum vegna veðurs, en við vorum alltaf að færa okkur til út af veðri. Túrnum lukum við síðan út af Norðurlandi í ufsaleit. Hvað afla varðar voru tvær fyrstu vikurnar í túrnum heldur lélegar, en seinni tvær voru bara góðar,“ segir Theodór.
 

27 þúsund tonn af makríl og 26 þúsund tonn af síld

Beitir NK heldur til veiða að lokinni löndun á norsk-íslenskri síld. Ljósm. Helgi Freyr ÓlasonBeitir NK heldur til veiða að lokinni löndun á
norsk-íslenskri síld. Ljósm. Helgi Freyr Ólason
Hjá Síldarvinnslunni mynda makríl- og norsk-íslenska síldarvertíðin eina heild. Síldveiðarnar voru hafnar áður en makrílveiðunum lauk um miðjan septembermánuð. Makrílvertíðin hófst 20. júlí og síðasta síldarfarminum var landað 23. október. Alls voru 53 þúsund tonn tekin til vinnslu á þessum tíma; tæplega 27 þúsund tonn af makríl og rúmlega 26 þúsund tonn af síld. Öll áhersla var lögð á að vinna makrílinn og síldina til manneldis og var unnið á þrískiptum vöktum í fiskiðjuveri fyrirtækisins í Neskaupstað. Vinnslan var nánast samfelld og einungis tekið stutt frí yfir verslunarmannahelgina. Fjögur skip önnuðust hráefnisöflun fyrir fiskiðjuverið en það voru Beitir NK, Börkur NK, Bjarni Ólafsson AK og Margrét EA. Þá landaði Hákon EA frystum afurðum í Neskaupstað.
 
Hjörvar Hjálmarsson, skipstjóri á Berki, segir að bæði makrílvertíðin og síldarvertíðin hafi gengið einstaklega vel. „Þegar við hófum veiðar á makrílnum var hann farinn að ganga í austur frá landinu og í reyndinni fengust fáir túrar innan íslenskrar lögsögu en mest var veitt í Síldarsmugunni. Veiði var almennt mjög góð og fiskurinn var stór og hentaði vel til vinnslu. Síðan kom að því að makríllinn gekk út úr Smugunni og inn í norska lögsögu og þá lauk okkar veiðum. Síldin var hins vegar að langmestu leyti veidd skammt austur af landinu; á Héraðsflóanum og á Glettinganesgrunni og þar norður af. Það var mikið af síld og holin urðu að vera stutt. Fyrir kom að menn lentu í því að fá allt of stór hol þó reynt væri að sýna aðgæslu. Að því kom að síldin gekk austur í Smuguna og við eltum hana þangað og þar var veitt undir lokin,“ segir Hjörvar.
 
Jón Gunnar Sigurjónsson, yfirverkstjóri í fiskiðjuverinu, segir að makríl- og síldarvertíðin hafi gengið einstaklega vel. „Vinnslan gekk eins og best var á kosið enda hráefnið afar gott. Makríllinn var góður og síldin veiddist lengst af við bæjardyrnar þannig að hún var ferskt úrvalshráefni auk þess að vera stór og falleg. Framleitt var allan vertíðartímann ef undan er skilið stutt hlé sem gert var yfir verslunarmannahelgina. Lykillinn að góðum árangri hjá okkur er gott starfsfólk. Það er svo einfalt að þetta tekst ekki nema með mjög góðu starfsfólki. Næst á dagskrá hjá okkur er að búa til okkar árlegu jólasíld og síðan verður kíkt á íslensku sumargotssíldina þegar veiðar á henni hefjast og kannað hvort hún verður hæf til manneldisvinnslu. Svo er það stóra spurningin: Verður einhver loðnuvertíð ?“, segir Jón Gunnar.

Heldur döpur veiði hjá togurunum

Vinnsla er stöðug í frystihúsinu á Seyðisfirði. Ljósm. Ómar BogasonVinnsla er stöðug í frystihúsinu á Seyðisfirði.
Ljósm. Ómar Bogason
Í lok síðustu viku komu flestir togarar á Austfjarðamiðum til hafnar vegna brælu. Þegar veiði hófst á ný reyndist hún vera heldur döpur. Gullver NS kom til hafnar á Seyðisfirði í morgun og var afli hans 83 tonn. Rúnar L. Gunnarsson skipstjóri segir að þorskveiði hafi hvergi gengið vel síðustu dagana. „Þetta virðist vera svona allt í kringum landið og það eru óþægileg viðbrigði því afli hefur verið mjög góður að undanförnu hér fyrir austan og við fórum marga fullfermistúra sem tóku einungis 3-4 daga. Við vorum núna að veiða á Tangaflakinu, í Reyðarfjarðardýpinu og út af Gerpisflaki og það er alls staðar sama sagan – heldur lítið að hafa. Þetta er sláandi, en hlýtur að lagast,“ segir Rúnar.
 
Kapp hefur verið lagt á að frystihúsið á Seyðisfirði hafi nægt hráefni þó svo afli hafi minnkað. Þessa vikuna hefur þar verið unninn afli úr Gullver, Smáey VE, Vestmannaey VE og Björgu EA.  Að jafnaði eru unnar ferskar afurðir í húsinu fjóra daga vikunnar en fimmta daginn eru afurðirnar frystar. Fersku afurðirnar eru fluttar út með Norrænu, Mykinesi eða með Eimskip frá Reyðarfirði. Árdís Sigurðardóttir, vinnslustjóri í frystihúsinu, segir að það skipti miklu máli að nægur fiskur fáist til vinnslu „Hér er nóg vinna alla daga og það skiptir mestu máli. Fiskurinn kemur úr ýmsum skipum auk Gullvers. Það er ekki óalgengt að afli minnki í október eða nóvember og þá skiptir svo miklu máli að fá fisk frá fleiri skipum. Afli hefur verið óvenju góður hér fyrir austan að undanförnu og því er breytingin býsna mikil þegar hann verður tregari,“ segir Árdís.
 

Síldarvinnslan framúrskarandi

Framurskarandi 2019Nýlega tilkynnti Creditinfo hvaða fyrirtæki á Íslandi teldust framúrskaransi á rekstrarárinu 2018 samkvæmt þeim viðmiðum sem notuð eru, en Creditinfo hefur unnið lista yfir framúrskarandi fyrirtæki í tíu ár. Alls eru 874 fyrirtæki á listanum þetta árið eða 2% allra fyrirtækja á landinu.
 
Á listanum yfir framúrskarandi fyrirtæki er þeim skipt í þrjá stærðarflokka; lítil fyrirtæki, meðalstór og stór. Síldarvinnslan er í flokki stórra fyrirtækja og er þar í tólfta sæti. Reyndar hefur Síldarvinnslan verið á lista yfir framúrskarandi fyrirtæki samfellt frá árinu 2012 og í fyrra var fyrirtækið í tuttugasta sæti. Fram kemur á listanum að eignir Síldarvinnslunnar séu 59.484.531 þúsundir króna og eigið fé 38.851.660 þúsundir króna eða 65,3%.
 
Þegar fyrirtæki eru skoðuð eftir landshlutum kemur fram að 35 fyrirtæki eru framúrskarandi á Austurlandi og þar er Síldarvinnslan í fyrsta sæti.

Ristilspeglun

logo

                Síldarvinnslan hefur undanfarin ár boðið starfsfólki sínu, sem er 50 ára og eldra, upp á ristilspeglun sem framkvæmd er í Fjórðungssjúkrahúsinu í Neskaupstað. Hefur starfsfólkið hagnýtt sér þetta í ríkum mæli og í einstaka tilvikum hefur speglunin komið í veg fyrir alvarleg veikindi. Hingað til hefur verið hringt í starfsfólkið og því boðið að fara í speglunina en ný persónuverndarlög koma í veg fyrir að sá háttur verði hafður á lengur. Þess í stað þarf starfsfólkið að panta tíma í speglunina með því að senda skilaboð á netfangið This email address is being protected from spambots. You need JavaScript enabled to view it. og í skilaboðunum þarf að koma fram nafn, kennitala og símanúmer viðkomandi.

                Starfsfólkið þarf að greiða fyrir ristilspeglunina en Síldarvinnslan mun síðan endurgreiða kostnaðinn við framvísun greiðslukvittunar.