Annir í frystigeymslunum á makrílvertíðinni

Einn kemur þá annar fer. Margrét EA kemur til löndunar og Bjarni Ólafsson AK heldur til veiða að lokinni löndun. Ljósm. Smári GeirssonEinn kemur þá annar fer. Margrét EA kemur til löndunar og
Bjarni Ólafsson AK heldur til veiða að lokinni löndun.
Ljósm. Smári Geirsson
Makrílvertíð er ávallt annatími hjá starfsmönnum frystigeymsla Síldarvinnslunnar í Neskaupstað en makrílvinnsla hófst sl. laugardag. Í frystigeymslunum er tekið á móti allri framleiðslu fiskiðjuvers fyrirtækisins og einnig landa skip sjófrystum afurðum beint í geymslurnar. Heimir Ásgeirsson, verkstjóri í frystigeymslunum, segir að fastir starfsmenn í frystigeymslunum séu fjórir talsins en síðan komi fleiri til starfa við upp- og útskipanir. „Það fer mikið magn í gegnum frystigeymslurnar á makrílvertíðinni. Fyrstu fimm sólarhringa vertíðarinnar hefur verið samfelld vinnsla í fiskiðjuverinu og þá hefur Hákon EA landað einum farmi af sjófrystum makríl. Auðvitað höfum við nóg pláss því frystigeymslurnar rúma á bilinu 15 til 18 þúsund tonn. Mikið af makrílnum er flutt út í gámum en síðan koma einnig flutningaskip og lesta misjafnlega mikið magn. Eitt er víst að það verður nægum verkum að sinna á makrílvertíðinni sem nú er nýhafin,“ segir Heimir.
 
Ekkert lát er á makrílvinnslu í Neskaupstað. Í gær kom Bjarni Ólafsson AK til löndunar með um 500 tonn og í dag kom Margrét EA  með um 900 tonn. Skipin mættust á Norðfirði skömmu fyrir hádegi eins og meðfylgjandi mynd sýnir.

Góður afli hjá Eyjunum í sumar

Bergey VE. Ljósm. Guðmundur AlfreðssonBergey VE. Ljósm. Guðmundur AlfreðssonÍsfisktogararnir Vestmannaey VE og Bergey VE hafa fiskað vel það sem af er sumri að sögn Arnars Richardssonar rekstrarstjóra Bergs-Hugins, dótturfélags Síldarvinnslunnar. Sérstaklega mun ýsuveiði hafa verið góð hjá skipunum. Arnar segir að stundum hafi veiðiferðirnar verið afar stuttar. „Nefna má að bæði skipin fóru út sl. fimmtudagskvöld og voru komin til löndunar fyrir hádegi á laugardag með fullfermi. Fullfermi hjá þessum skipum er tæp 70 tonn og þarna komu þau með blandaðan afla. Að lokinni löndun fóru þau síðan út á sunnudag og komu að landi í dag með fullfermi og nú er aflinn fyrst og fremst ufsi, karfi og ýsa. Almennt má segja að fiskiríið hafi verið gott í sumar og engin ástæða til að kvarta undan því,“ segir Arnar.
 
Það eina sem skyggir á góð aflabrögð að mati Arnars er verðþróun á mörkuðum. Hann segir að verð á ýsu hafi verið lágt ekki síst vegna mikils framboðs og svo sé ekki óalgengt að fiskverð lækki heldur yfir sumartímann. „Nú er hitabylgja í Evrópu og þá borða menn ekki mikinn fisk. Í slíku veðri grillar fólk og fiskneysla dettur niður,“ segir Arnar.

Gullver til veiða á ný

Gullver NS. Ljósm. Ómar BogasonGullver NS. Ljósm. Ómar BogasonÍsfisktogarinn Gullver NS kom úr slipp á Akureyri sl. laugardag. Í slippnum var aðalvél skipsins tekin upp, unnið að endurbótum á vinnsluþilfari auk þess sem skipið var málað og ýmsum viðhaldsverkefnum sinnt. Gullver hélt strax til veiða og hafði heimasíðan samband við Rúnar L. Gunnarsson skipstjóra. „Við fórum beint í Lónsbugtina og höfum verið að fá þar ufsa og ýsu. Aflinn hefur verið þokkalegur. Gert er ráð fyrir að við löndum á fimmtudagsmorgun,“ sagði Rúnar.

Makrílvertíð komin á fullt

Frá fiskiðjuverinu í NeskaupstaðFrá fiskiðjuverinu í NeskaupstaðMakrílvinnsla hófst í fiskiðjuveri Síldarvinnslunnar í Neskaupstað sl. laugardag þegar Margrét EA kom þangað með fyrsta farm vertíðarinnar, 840 tonn. Eins og venjulega þurfti að ýmsu að hyggja þegar vinnsla hófst, en vélbúnaður fiskiðjuversins er flókinn og ávallt tekur einhvern tíma til að fá hann til að virka sem skyldi. Þegar vinnslu úr Margréti lauk var Beitir kominn til hafnar með 860 tonn og hófst vinnsla úr honum í morgun. Heimasíðan ræddi við Tómas Kárason, skipstjóra á Beiti, um þessa fyrstu veiðiferð vertíðarinnar. „Það gekk býsna vel að ná aflanum. Við fengum hann í sex stuttum holum, en það er aldrei togað lengur en í þrjá og hálfan til fjóra tíma. Við hófum veiðar við Háfadýpið en enduðum austan við Skaftárdýpi og það er örugglega makríll enn austar. Það bendir allt til þess að töluverður makríll sé á ferðinni en eins og venjulega er veiðiárangur misjafn. Hann blossar upp á tilteknu svæði en svo getur hann horfið þar býsna snögglega. Mér líst bara vel á þessa makrílvertíð, allavega fer hún ágætlega af stað,“ segir Tómas.
 
Börkur NK kom til hafnar í Neskaupstað í morgun með 600 tonn og tekur Hálfdan Hálfdanarson skipstjóri undir með Tómasi um að vertíðin fari vel af stað. „Við fengum þennan afla í fjórum holum og það var ekkert mála að fiska. Við hófum veiðarnar vestur í Skaftárdýpi og fylgdum síðan kantinum austur eftir og enduðum í Hornafjarðardýpinu. Fiskurinn virtist vera á fullri ferð austur. Þetta byrjar vel og vonandi verður áframhald á því,“ segir Hálfdan.
 
Auk makrílskipanna sem landa afla sínum í fiskiðjuverið hófst löndun á frystum makríl úr Hákoni EA í Neskaupstað í morgun. Afli skipsins er 650 tonn.

Makrílvertíð að hefjast hjá Síldarvinnslunni

Makrílvertíðin er að hefjast hjá SíldarvinnslunniMakrílvertíðin er að hefjast hjá SíldarvinnslunniNú er makrílvertíðin að hefjast hjá Síldarvinnslunni en gert hefur verið ráð fyrir að vinnsla á makrílnum hæfist 20. júlí og er ljóst að það mun standast. Fullráðið er fyrir vertíðina í fiskiðjuverið í Neskaupstað, en þar verður unnið á þrískiptum vöktum. Fjögur skip munu  landa afla sínum til vinnslu í fiskiðjuverinu og eru það Börkur NK, Beitir NK, Bjarni Ólafsson AK og Margrét EA. 
 
Í fiskiðjuverinu hefur undirbúningur vertíðarinnar staðið um hríð og er þar allt tilbúið. Í dag fer fram nýliðafræðsla en hluti starfsfólksins hefur ekki starfað við fiskvinnslu áður.
 
Margrét hóf makrílveiðar á miðvikudag og er væntanleg til Neskaupstaðar í fyrramálið með 840 tonn. Birkir Hreinsson, skipstjóri á Margréti, segir að þessa fyrsta veiðiferð vertíðarinnar hafi gengið vel. „Við tókum fyrsta holið á miðvikudagsmorgun suður af Vestmannaeyjum og fengum þá 300 tonn. Næstu þrjú hol voru tekin á sömu slóðum og þau gáfu miklu minna eða 80, 110 og síðan einungis 20 tonn. Þá færðum við okkur austar og tókum tvö hol utan í Kötlugrunni og upp í kantinn. Þá fengum við fyrst 190 tonn eftir að hafa togað í tvo tíma og þrjú korter og síðan 120 tonn. Segja má að þessi fyrsta veiðiferð makrílvertíðarinnar hafi blessast vel og hér um borð eru allir afskaplega ánægðir með að vera komnir á sjóinn aftur. Við komum til Akureyrar að lokinni kolmunnaveiði hinn 14. maí og síðan hefur skipið legið. Það var því löng bið eftir að komast til veiða á ný. Það er erfitt að gera sér grein fyrir því hve mikill makríll er á ferðinni við landið. Hann blossar upp á tilteknu svæði og svo hverfur hann – eina stundina er mokveiði, en lítið að hafa þá næstu. Svona er þetta bara,“ segir Birkir.
 
Beitir hóf veiðar í gærmorgun og Börkur mun hefja veiðar í dag. Bjarni Ólafsson er að verða klár til að halda til veiða. 

Tilhlökkunarefni að fara að fiska á þetta skip

Nýja Vestmannaey siglir inn til Eyja í fyrsta sinn í dag. Ljósm. Guðmundur AlfreðssonNýja Vestmannaey siglir inn til Eyja í fyrsta sinn í dag.
Ljósm. Guðmundur Alfreðsson
  
Birgir Þór Sverrisson skipstjóri á Vestmannaey VE. Ljósm. Guðmundur AlfreðssonBirgir Þór Sverrisson skipstjóri á Vestmannaey VE. Ljósm. Guðmundur AlfreðssonVestmannaey VE  kom til heimahafnar í Vestmannaeyjum í dag og var vel tekið á móti skipinu. Í tilefni heimkomunnar ræddi heimasíðan stuttlega við Birgi Þór Sverrisson skipstjóra og var fyrst spurt hvernig honum litist á nýja skipið. „Mér líst afskaplega vel á þetta skip. Það er glæsilegt í alla staði og með miklum og góðum búnaði. Þegar skipið er borið saman við gömlu Vestmannaey blasir við fullkomnari aðstaða að flestu leyti. Má þar til dæmis nefna vinnuumhverfið á millidekki og í brúnni en þar er um mikla breytingu að ræða. Þá má nefna að í skipinu eru tvær vélar og tvær skrúfur og ég tel fullvíst að það hafi í för með sér meiri togkraft. Skipið er einkar hljóðlátt. Það heyrist lítið í vélunum og öll spil eru knúin rafmagni. Þá er þetta skip sérstaklega mjúkt og fer vel með mannskapinn. Við fengum kaldaskít á leiðinni til landsins og upplifðum þá hvernig það fer í sjó. Það er svo sannarlega tilhlökkunarefni að fara að fiska á þetta skip en það mun ekki gerast fyrr en um mánaðamótin ágúst-september. Það á eftir að ganga frá búnaði á millidekkinu en sú vinna verður hafin í Vestmannaeyjum og síðan verður dekkið klárað í Slippnum á Akureyri“, segir Birgir Þór.
             
Upplýsingar um nýja Vestmannaey:
 
               Lengd            28,9 m
               Breidd          12 m
               Brúttótonn  611
               Nettótonn   183,4
               Klassi           DNVGL+1A1
               Aðalvél        2x Yanmar 6EY17W 294 kw
               Hjálparvél    Nogva Scania DI13 HCM534CDE-1 1800/mín
               Gír                2x Finnoy, hvor með sinn rafal. Skrúfáshraði 205/mín
               Skrúfa          2x Finnoy, 2 m í þvermál. Silent fishing.
               Hliðarskrúfa frá Brunvoll
               Allar vindur rafdrifnar frá SeaOnics
              Togvindur knúnar PM sísegulmótor
              Löndunarkrani frá Aukra Marine
              Autotroll frá Scantrawl
               Skilvindur frá Westfalia
                   -tvær smurolíuskilvindur
                   -ein eldsneytisskilvinda
                   -ein austursskilvinda
              Rafkerfi 440 volt 60 rið tvískipt, sb,bb
              Flest tæki í brú frá Furuno
              3D mælir frá Wasp
              Skjákerfi og stjórnbúnaðarkerfi frá SeaQ
              Rafkerfi frá Vard Electro
              Björgunarbúnaður frá Viking