Makrílvinnslan gengur vel

 

Beitir NK landar makríl til vinnslu. Ljósm. Hákon ErnusonBeitir NK landar makríl til vinnslu. Ljósm. Hákon Ernuson

Beitir NK kom til Neskaupstaðar í nótt með 600 tonn af makríl til vinnslu. Er þetta síðasti farmurinn sem unninn verður fyrir verslunarmannahelgarfrí. Tómas Kárason, skipstjóri á Beiti, segist vera bjartsýnn varðandi framhald makrílvertíðarinnar. „Þetta er miklu betra en í fyrra og það virðist vera meiri makríll innan lögsögunnar en þá var. Nú eru bátarnir að fiska bæði hér austurfrá og eins við Vestmannaeyjar. Við vorum allan þennan túr austur úr Hvalbaknum og það var sífellt að ganga þarna makríll. Það gekk þó heldur illa að veiða yfir nóttina en betur veiddist á daginn. Við makrílveiðarnar er þetta oft ýmist í ökkla eða eyra – stundum fást einungis nokkur tonn í holi en svo eru menn að fá allt upp í 400 tonna hol,“ segir Tómas.
 
Jón Gunnar Sigurjónsson, verkstjóri í fiskiðjuveri Síldarvinnslunnar, segir að vinnslan á makrílnum gangi mjög vel. „Makríllinn er ýmist heilfrystur eða frystur hausskorinn og það eru unnin 600-800 tonn á sólarhring, en magnið fer eftir vinnsluaðferð. Nú er búið að taka á móti um 6000 tonnum á vertíðinni og hjá Síldarvinnslunni er um að ræða heildstætt skipulag á veiðum og vinnslu. Hjá okkur landa fjögur skip og veiðar þeirra eru skipulagðar þannig að ávallt sé ferskt og gott hráefni til staðar fyrir vinnsluna. Til þessa hefur verið unnið á tvískiptum vöktum í fiskiðjuverinu en eftir verslunarmannahelgi verður unnið á þrískiptum vöktum. Ég tel að þetta skipulag sé til fyrirmyndar og það gengur afar vel,“ segir Jón Gunnar.
 
Gert er ráð fyrir að vinnsla í fiskiðjuverinu hefjist á ný á mánudagskvöld að loknu fríi um verslunarmannahelgina.

Blængur kominn úr góðum túr

Landað úr Blængi NK. Ljósm. Hákon ErnusonLandað úr Blængi NK. Ljósm. Hákon ErnusonFrystitogarinn Blængur kom til Neskaupstaðar í gær úr góðum tveggja vikna túr. Afli skipsins var 300 tonn upp úr sjó að verðmæti 134 milljónir króna. Theodór Haraldsson skipstjóri segir að túrinn hafi í reynd gengið afar vel og verið tíðindalítill. „Við byrjuðum í þokkalegu grálúðukroppi, síðan var farið í Berufjarðarál í ufsa og loks var ýsa veidd á Stokksnesgrunni. Veiðin var góð lengst af og fiskað eins og vinnslan hafði undan. Það var blíðuveður allan túrinn, en kolsvört þoka. Þokan var svo dimm að við sáum oft ekki aftur á gálga,“ segir Theódór.
 
Blængur heldur til veiða á ný eftir verslunarmannahelgi.

Bergey VE komin á flot

Bergey VE var sjósett í morgun. Ljósm. Kristján VilhelmssonBergey VE var sjósett í morgun. Ljósm. Kristján VilhelmssonBergey VE, sem nú er í smíðum hjá skipasmíðastöðinni Vard í Aukra í Noregi, var sjósett í morgun klukkan átta að íslenskum tíma. Bergey er systurskip Vestmannaeyjar VE sem kom ný til landsins fyrr í þessum mánuði. Skipin eru smíðuð fyrir Berg-Hugin í Vestmannaeyjum, sem er dótturfyrirtæki Síldarvinnslunnar. Vestmannaey var fyrsta skipið af sjö sömu gerðar sem Vard smíðar fyrir íslensk útgerðarfyrirtæki.
 
Smíðin á Bergey er á áætlun en gert er ráð fyrir að skipið verði afhent Bergi-Hugin í lok september nk.

Gullver landar fullfermi

Gullver NS við bryggju framan við frystihúsið á Seyðisfirði. Ljósm. Þorgeir BaldurssonGullver NS við bryggju framan við frystihúsið á Seyðisfirði.
Ljósm. Þorgeir Baldursson
Í dag er verið að landa fullfermi úr ísfisktogaranum Gullver NS á Seyðisfirði. Afli skipsins er 102 tonn og er hann blandaður; þorskur, ýsa, ufsi og karfi. Rúnar L. Gunnarsson skipstjóri segir að vel hafi gengið að fiska í veiðiferðinni. „Það aflaðist ágætlega en túrinn var fjórir dagar höfn í höfn. Við vorum mest í Berufjarðarál, Lónsdýpi og á Papagrunni en enduðum á Herðablaðinu í þorski. Þetta er annar túrinn eftir að skipið kom úr slipp og það hefur bara gengið vel í þeim. Við getum varla kvartað,“ segir Rúnar.
 
Gert er ráð fyrir að Gullver haldi á ný til veiða annað kvöld.
 
Frystihúsið á Seyðisfirði hefur verið lokað að undanförnu vegna sumarleyfa starfsfólks en vinnsla mun hefjast þar á ný eftir verslunarmannahelgi. Vinnsluhléið hefur verið notað til að setja upp tvo nýja frystiskápa þannig að frystigeta hússins mun aukast verulega.