Veður truflar og oft landað

Peyjarnir á Vestmannaey VE í aðgerð. Ljósm. Valtýr AuðbergssonPeyjarnir á Vestmannaey VE í aðgerð.
Ljósm. Valtýr Auðbergsson
Veður hefur að undanförnu haft mikil áhrif á veiðar Vestmannaeyjaskipanna Vestmannaeyjar VE og Bergeyjar VE. Sannleikurinn er sá að þau hafa þurft að veiða í skjóli af Eyjunum og ekki komist á önnur mið vegna veðurs. Að sögn Arnars Richardssonar rekstrarstjóra eru skipstjórar skipanna enn ekki alveg sáttir við fiskiríið að undanförnu og telja að fiskgengd sé heldur minni en síðustu ár. Aflinn hefur að mestu verið þorskur en nú er beðið eftir að ýsa gangi á miðin. Bæði skipin leggja mikla áherslu á ýsuveiðar.
 
Arnar segir að skipin hafi gjarnan landað á tveggja daga fresti að undanförnu. Sem dæmi nefnir hann að Vestmannaey hafi haldið til veiða sl. fimmtudagsmorgun og landað síðla sama dag 20 tonnum. Farið var út að löndun lokinni og landað fullfermi eða um 70 tonnum á laugardag. Strax eftir löndun var farið út og komið að landi á sunnudagskvöld með 55 tonn. Landað var úr skipinu í gærmorgun og síðan var haldið til veiða á ný síðdegis í gær. Bergey hefur verið á svipuðu róli og Vestmannaey að undanförnu.

Kolmunna landað og síðan veiðihlé

Hákon EA að landa kolmunna í Neskaupstað sl. föstudag. Ljósm. Smári GeirssonHákon EA að landa kolmunna í Neskaupstað sl. föstudag.
Ljósm. Smári Geirsson
Fjögur skip lönduðu kolmunna í verksmiðjur Síldarvinnslunnar í Neskaupstað og á Seyðisfirði um og fyrir sl. helgi. Bjarni Ólafsson AK kom til Seyðisfjarðar á fimmtudagskvöld með rúmlega 1.600 tonn og í kjölfar hans kom Beitir NK aðfaranótt laugardagsins með rúmlega 2.000 tonn. Hákon EA kom til Neskaupstaðar aðfaranótt föstudagsins og landaði rúmlega 900 tonnum í verksmiðjuna ásamt því að landa um 230 tonnum af frystum afla. Á laugardag var síðan landað rúmlega 1.900 tonnum úr Berki NK í Neskaupstað.
 
Að loknum þessum löndunum verður gert hlé á kolmunnaveiðum að sinni enda heldur fiskurinn sig ekki lengur í alþjóðasjónum vestur af Írlandi. Áformað er að skipin haldi á ný til veiða eftir tíu daga eða svo þegar gera má ráð fyrir að kolmunninn hafi gengið inn í færeyska lögsögu.
 
Frá því að fyrsti kolmunnafarmurinn á árinu barst til Síldarvinnslunnar í janúar sl. hefur fyrirtækið tekið á móti 39.674 tonnum til vinnslu. Til Neskaupstaðar hafa borist 26.544 tonn og til Seyðisfjarðar 13.130 tonn.
 

Jafn og góður afli það sem af er ári

Gullver NS kemur til löndunar. Ljósm. Ómar Bogason.Gullver NS kemur til löndunar. Ljósm. Ómar Bogason.Ísfisktogarinn Gullver NS kom til Seyðisfjarðar í gærmorgun að lokinni veiðiferð og var aflinn rúmlega 82 tonn. Uppistaða aflans var þorskur og karfi. Þórhallur Jónsson skipstjóri segir að vel hafi gengið að veiða en veðrið hafi hins vegar verið leiðinlegt. „Þorskinn fengum við á Fætinum en karfann í Hornafjarðardýpi og Öræfagrunni. Það hefur verið góður afli það sem af er árinu en í febrúar og það sem af er marsmánuði hafa verið bölvaðar brælur. Menn eru orðnir hálfþreyttir á veðurlaginu. Það hefur verið meiri fiskur hérna fyrir austan en verið hefur á þessum árstíma síðustu tvö árin. Síðustu tvö ár þurftum við að fara vestur á Selvogsbanka til að fá þorsk í mars- og aprílmánuði en nú er staðan allt önnur,“ segir Þórhallur.
 
Til stóð að Gullver héldi til veiða á ný í gærkvöldi en vegna veðurs var brottför frestað. Gert er ráð fyrir að skipið leggi úr höfn í kvöld.

Þyrluæfing hjá Blængsmönnum

Þyrluæfing hjá BlængsmönnumÍ gærdag æfðu skipverjar á Blængi NK að taka á móti björgunarþyrlu Landhelgisgæslunnar út af Helguvík. Áður hafði áhöfnin æft notkun léttabátsins um borð við Hafnarfjörð. Blængur hafði verið að veiðum á Eldeyjarbanka en þurfti að sigla í var vegna veðurs og þá var tíminn nýttur til björgunaræfinga. Heimasíðan sló á þráðinn til Theodórs Haraldssonar skipstjóra og spurði hann sérstaklega út í þyrluæfinguna. „Ég hafði samband við þyrluna og því var vel tekið að nýta tímann til æfinga. Áhöfn þyrlunnar,TF SYN, æfði með áhöfnum þriggja skipa sem lágu þarna í vari, en auk okkar fengu áhafnir Björgvins EA og Tjalds SH æfingu í gær. Þegar æfingin fór fram var tiltölulega hvasst eða 18-20 metrar en hinsvegar sjólaust. Við æfinguna þarf að gæta að mörgu eins og til dæmis stefnu skipsins, hraða þess og síðan að hafa allt klárt á dekkinu. Það sigu tveir menn úr þyrlunni og eins voru sjúkrabörur sendar um borð og hífðar upp. Við tókum á móti mönnunum og börunum og æfðum allt sem gera þurfti. Það var mjög gott og gagnlegt að fá þessa þyrluæfingu en við höfum aldrei æft með þyrlunni áður. Eins var gott að nota tímann í brælunni til þessara æfinga því öryggismálin mega aldrei gleymast,“ segir Theodór. 
 
Að lokinni þyrluæfingunni hélt Blængur út á Eldeyjarbanka á ný en í morgun var hann að karfaveiðum á Melsekk.
 
Þyrluæfing hjá Blængsmönnum  Þyrluæfing hjá Blængsmönnum