Ævisaga Magna Kristjánssonar skipstjóraÚt er komin ævisaga Magna Kristjánssonar skipstjóra frá Neskaupstað. Hann var árum saman skipstjóri á bátum Síldarvinnslunnar m.a. á fyrsta skuttogara Íslendinga, Barða. Í bókinni, sem Ragnar Ingi Aðalsteinsson frá Vaðbrekku skrifar, segir Magni frá mörgu eftirminnilegu, svo sem:
 
- uppvexti í Neskaupstað
- sveitadvöl og síldveiðiævintýri í Mjóafirði
- sérkennilegum jólagjöfum hans og Dadda Dóra
- áflogum um borð í síðutogara
- fyrsta skuttogaranum
- Jóni gaur
- ríflega 50 daga siglingu heim frá Japan
- torkennilegum kapli á grunnslóðinni
- æsilegum átökum í Þorskastríðinu
- uppreisn á loðnuflotanum
- þróunarstarfi á Grænhöfðaeyjum
- örnefnum á hafsbotni
- eftirminnilegum fundi hjá Farmanna- og fiskimannasambandinu
- sögulegum hreindýraveiðum
- sviptingum í pólitík og mörgu fleiru.
 
Magni segir frá af hispursleysi og hreinskilni. Hann var mikill áhugamaður um kolmunnaveiðar, kenndi sjómönnum ýmis fræði, kom á fót söfnum í heimabyggð sinni og svo mætti lengi telja. Þá tóku Norðmenn feil á honum og sjónvarpshetju sinni, sjálfum Fleksnes, og var hann ekkert að leiðrétta þá.
 
Magni var stýrimaður á Berki elsta en síðan skipstjóri á skuttogaranum Barða á árunum 1970-1973. Hann tók síðan við skuttogaranum Bjarti árið 1973 og sat þar í skipstjórastóli til 1976. Lengst var síðan Magni skipstjóri á Stóra-Berki eða á árunum 1976-1989.