Blængur á leið í Barentshafið eftir erfiðan úthafskarfatúr

Blaengur NK. Ljósm. Bergþór GunnlaugssonBlængur NK. Ljósm. Bergþór GunnlaugssonFrystitogarinn Blængur NK sigldi inn á Norðfjörð í morgun að aflokinni veiðiferð í úthafskarfa á Reykjaneshrygg. Áhöfnin mun þrífa skipið hátt og lágt en veiðiferðinni mun ljúka formlega á fimmtudagsmorgun. Úthafskarfaveiðin var afar slök en nk. mánudag mun skipið væntanlega halda til veiða í Barentshafið og gera menn sér vonir um að veiðiferð þangað muni bæta upp aflaleysið á Reykjaneshryggnum. Heimasíðan ræddi við Theodór Haraldsson skipstjóra á Blængi í gær og spurði nánari frétta. „Við lögðum af stað í úthafið hinn 7. maí og vorum þar að veiðum í 12 daga. Aflinn var innan við 150 tonn og því fer fjarri að það geti talist viðunandi. Svona túrar eru erfiðir. Þarna hafa átt sér stað miklar breytingar á ekki svo löngum tíma. Fyrir nokkrum árum veiddu menn þarna tugi þúsunda tonna af úthafskarfa en þeir tímar virðast vera liðnir, allavega virtist svo vera á meðan við vorum á miðunum. Annars voru fréttir af góðri veiði þegar við lögðum af stað í veiðiferðina en hún datt algjörlega niður. Eina íslenska skipið sem var þarna að veiðum ásamt okkur var Vigri RE en hann stoppaði stutt. Þarna var síðan einn Þjóðverji og einn Norðmaður og þó nokkrir Rússar. Rússarnir koma þarna hvert ár með sinn flota og eru þarna að fiska með mjög stórum trollum, mun stærri en við notum. Eftir að við fórum úr úthafinu höfum við veitt í þrjá og hálfan sólarhring við landið og lagt áherslu á karfa, ufsa og nú síðast grálúðu. Við fengum einn góðan sólarhring í karfa í Skeiðarárdýpinu en það hefur verið lítið um ufsa og karfa út af Austfjörðum. Menn geta hins vegar alls staðar fengið þorsk en þorskveiði hefur ekki verið á dagskrá hjá okkur. Næsta verkefni hjá okkur er Barentshafið og stefnan verður tekin þangað strax eftir sjómannadag. Þar á að veiða þorsk og vonandi mun það ganga vel. Við þurfum góðan túr til að hressa okkur við eftir úthafskarfann á Reykjaneshryggnum,“ segir Theodór.

Nú er lögð áhersla á blandaðan afla

Bergey VE. Ljósm. Guðmundur AlfreðssonBergey VE. Ljósm. Guðmundur AlfreðssonVeiðin hjá Vestmannaey VE og Bergey VE hefur verið góð það sem af er mánuði. Skipin hafa fengið yfir 700 tonn en þau hafa lagt áherslu á að fiska annað en þorsk. Þau hafa veitt löngu, lýsu, steinbít og kola, en nú hafa þau hafið ýsuveiðar. Slegið var á þráðinn til Jóns Valgeirssonar skipstjóra á Bergey í morgun og spurt hvernig gengi að forðast þorskinn. „Það er bara erfitt. Það er svo mikið af þorski út um allt að hann truflar verulega þegar veiða á aðrar tegundir, en það þarf að sjálfsögðu að hugsa um fleira en þorsk. Við erum núna innarlega á Papagrunni að reyna við ýsu. Veiðin hefur gengið svona bærilega, en við komum ekki í neina ýsu fyrr en við vorum komnir austureftir. Áður lögðum við áherslu á steinbít og kola og þá var mest verið við Ingólfshöfðann. Lýsu höfum við fengið í fótreipi í Háfadýpinu, en mér finnst vera heldur minna af lýsu en verið hefur síðustu árin“, segir Jón.

Slysavarnaskóli sjómanna í Vestmannaeyjum

Verkleg kennsla fór fram um borð í skipunum. Ljósm. Óskar Pétur FriðrikssonVerkleg kennsla fór fram um borð í skipunum.
Ljósm. Óskar Pétur Friðriksson
Í síðustu viku var gert hlé á veiðum Vestmannaeyjar VE og Bergeyjar VE og settust áhafnir skipanna á skólabekk í tvo daga. Þrír leiðbeinendur frá Slysavarnaskóla sjómanna voru komnir til Eyja og önnuðust kennsluna, en um var að ræða svonefnt fimm ára endurmenntunarnámskeið. Sjómennirnir hlýddu á fyrirlestra og síðan fór verulegur hluti verklegu kennslunnar fram í þeirra eigin skipum sem er ótvíræður kostur. Kennsla af þessu tagi er afar mikilvæg og ekki veitir af að rifja upp kunnáttuna með reglulegu millibili.
 
Útgerðarfélagið Bergur-Huginn er Slysavarnaskólanum afar þakklátt fyrir að bjóða upp á umrætt námskeið í Eyjum og tókst námskeiðið vel í alla staði. 
 
Áhafnir Vestmannaeyjar VE og Bergeyjar VE ásamt  leiðbeinendum að loknu námskeiði. Ljósm. Óskar Pétur FriðrikssonÁhafnir Vestmannaeyjar VE og Bergeyjar VE ásamt leiðbeinendum að loknu námskeiði.
Ljósm. Óskar Pétur Friðriksson
 
 
 
 
 
 
 
 
 
 
 

Jafn og góður afli

Þórhallur Jónsson skipstjóri í brúnni. Ljósm. Þorgeir BaldurssonÞórhallur Jónsson skipstjóri í brúnni.
Ljósm. Þorgeir Baldursson
Ísfisktogarinn Gullver NS kom til Seyðisfjarðar að aflokinni veiðiferð á laugardagskvöld. Landað var úr skipinu á sunnudag og síðan var haldið til veiða síðdegis þann dag. Afli skipsins var 106 tonn; 37 tonn af þorski, 34 tonn af ufsa, 24 tonn af gullkarfa og um 9 tonn af ýsu. Heimasíðan sló á þráðinn til Þórhalls Jónssonar skipstjóra og spurði hvernig veiðiferðin hafi gengið. „Það má segja að hún hafi gengið vel. Það var jafn og góður afli allan túrinn, hinn besti reytingur. Við vorum einungis að veiðum í rétt rúmlega þrjá sólarhringa þannig að aflinn fór yfir 30 tonn á sólarhring. Við vorum í ýsu og þorski á Lónsbugtinni og síðan héldum við í Berufjarðarálinn og enduðum túrinn í Hvalbakshallinu,“ segir Þórhallur.
 
Hluti afla Gullvers fer til vinnslu í fiskvinnslustöðinni á Seyðisfirði og segir Ómar Bogason framleiðslustjóri að þar sé unninn þorskur, ýsa og ufsi. „Vinnslan er hefðbundin hjá okkur og við framleiðum bæði ferskt og frosið fyrir Evrópumarkað. Nú eru einhver teikn á lofti um hækkandi ufsaverð á mörkuðum og það kemur sér afar vel,“ segir Ómar.
 
Gullversmenn í aðgerð. Ljósm. Þorgeir BaldurssonGullversmenn í aðgerð. Ljósm. Þorgeir Baldursson
 
Trollið tekið á Gullver NS. Ljósm. Þorgeir BaldurssonTrollið tekið á Gullver NS. Ljósm. Þorgeir Baldursson