Síldveiðiskipin hætt veiðum fyrir jól

Síldarvinnsla í fiskiðjuveri Síldarvinnslunar.  Ljósm. Þórhildur Eir SigurgeirsdóttirSíldveiðiskipin Birtingur NK og Börkur NK komu til Neskaupstaðar í morgun og er þar með veiðum þeirra lokið fyrir jól.  Birtingur var með 320 tonna afla og Börkur með rúmlega 400 tonn en allur aflinn fer til manneldisvinnslu í fiskiðjuveri Síldarvinnslunnar. Skipin hafa að undanförnu verið að veiðum í Breiðamerkurdýpi og hefur veiðin yfirleitt verið dræm. Þá hefur síldin sem þar hefur veiðst verið mun smærri en sú síld sem fengist hefur í Breiðafirði

Meira fjör í Breiðamerkurdýpinu

Birtingur NK. Ljósm. Þorgeir BaldurssonBirtingur NK er á leið til Neskaupstaðar með um 750 tonn af síld sem fékkst í Breiðamerkurdýpinu. Að sögn Atla Rúnars Eysteinssonar stýrimanns fékkst aflinn á þremur nóttum í níu köstum en einungis fiskast á nóttunni. Tvær fyrstu næturnar skiluðu heldur litlu og var ekki mikla síld að sjá en í gærkvöldi var meira líf en verið hefur. Þá fékk Birtingur gott kast og fleiri bátar voru að fá þokkalegan afla, meðal annars fékk Börkur NK um 300 tonna kast. „ Síldin sem veiðist þarna er mun smærri en sú síld sem fengist hefur í Breiðafirðinum“, segir Atli Rúnar,“en það hefur lítið verið að hafa fyrir vestan og því er eðlilegt að látið sé reyna á veiðar þarna.“

Það er áhöfnin á Beiti NK sem er á Birtingi um þessar mundir en Beitir er í slipp í Danmörku og hefur verið seldur til Noregs. Polar Amaroq mun síðan fá nafnið Beitir og áhöfnin flytjast yfir á það skip. Að sögn Atla kunna þeir Beitismenn vel við sig á Birtingi enda hafa flestir eða allir verið á honum áður og þykir vænt um skipið.
 

 
 

Fyrsta síldin úr Breiðamerkurdýpi

Birtingur NK áður Börkur NK. Ljósm. Þorgeir Baldursson

Sl. laugardag kom Börkur NK til Neskaupstaðar með fyrstu síldina úr Breiðamerkurdýpi sem þangað hefur borist á vertíðinni. Eins og öllum er kunnugt hefur sáralítið veiðst af síld í Breiðafirðinum upp á síðkastið og þegar Börkur kom með umræddan afla var liðinn hálfur mánuður frá því að síðast barst afli til vinnslu í fiskiðjuver Síldarvinnslunnar. Gæftaleysi hefur verið mikið á miðunum fyrir vestan og auk þess hefur lítið fundist þar af veiðanlegri síld þannig að bátarnir hafa reynt fyrir sér á Breiðamerkurdýpi.

Afli Barkar í þessari veiðiferð var 630 tonn. Að sögn Jóns Gunnars Sigurjónssonar  verkstjóra í fiskiðjuverinu reyndist síldin úr Breiðamerkurdýpinu vera smærri en sú sem veiðist fyrir vestan en ágætlega gekk þó að vinna hana.

Áhöfn Beitis er nú við síldveiðar í Breiðamerkurdýpi á Birtingi NK en Beitir hefur verið seldur og er farinn í slipp til Danmerkur. Polar Amaroq mun síðan leysa Beiti af hólmi. 

Polar Pelagic festir kaup á vinnsluskipinu Gardar, Beitir NK tekinn upp í kaupin en Polar Amaroq verður Beitir

Vinnsluskipið Gardar .Grænlenska útgerðarfélagið Polar Pelagic, sem Síldarvinnslan á þriðjung í, hefur fest kaup á vinnsluskipinu Gardar af útgerðarfyrirtækinu K. Halstensen AS í Noregi. Beitir NK mun ganga upp í kaupin en núverandi uppsjávarskip Polar Pelagic, Polar Amaroq, mun verða eign Síldarvinnslunnar og fá nafnið Beitir.

Meginástæðan fyrir kaupunum á Gardar er nauðsyn þess að Polar Pelagic eignist vinnsluskip, ekki síst vegna nýtingar á makrílnum sem veiddur er innan grænlenskrar lögsögu. Gardar er stórt og öflugt skip sem hentar vel fyrir þær aðstæður sem grænlenska útgerðarfélagið býr við. Gardar var byggður árið 2004 og lengdur árið 2006. Hann er 3.200 brúttótonn að stærð, 83,8 m. á lengd og 14,6 m. á breidd. Skipið er vel búið öllum siglingatækjum og getur lestað 2535 tonn , þar af 2000 í kælitanka. Aðalvélin er 7507 ha. Wartsila og er skipið búið tveimur hliðarskrúfum, 950 ha. að framan og 1200 ha. að aftan. Frystigetan um borð er 140 tonn á sólarhring þegar miðað er við heilfrystan fisk en frystirýmið er fyrir 1000 tonn.

Beitir NK. Ljósm. Þórhildur Eir SigurgeirsdóttirBeitir NK mun ganga upp í kaupin á Gardar en Síldarvinnslan festi kaup á honum árið 2009. Beitir var byggður árið 1998 og er 2188 brúttótonn að stærð. Hann getur lestað 2100 tonn og er búinn 9.999 ha. aðalvél af gerðinni Wartsila. Polar Pelagic festi kaup á Polar Amaroq í marsmánuði á þessu ári en skipið var byggt árið 1997. Polar Amaroq  er 2148 brúttótonn að stærð og getur lestað um 2100 tonn rétt eins og Beitir. Í Polar Amaroq eru tvær aðalvélar af gerðinni MaK og er hvor um sig 3260 ha. þannig að heildarhestaflafjöldi er 6.520.

Polar Amaroq. Ljósm. Þórhildur Eir SigurgeirsdóttirGert er ráð fyrir að Gardar verði afhentur nýjum eiganda 15.-18. desember og Beitir NK verði afhentur á sama tíma. Polar Amaroq (hinn nýi Beitir) verður afhentur Síldarvinnslunni um svipað leyti.  Mun Beitir fara í slipp í Danmörku fyrir afhendingu og nokkrar endurbætur munu verða gerðar á Polar Amaroq. Frá því að Beitir heldur af landi brott og þar til að hinn nýi Beitir verður tilbúinn til veiða mun áhöfnin halda til síldveiða á Birtingi NK sem hefur að undanförnu legið í höfn á Seyðisfirði.